ԵՐԵՎԱՆ, 27 փետրվարի – Sputnik. ՀՀ վարչապետ Նիկոլ Փաշինյանը մինչև վերջ չի հասցնի սահմանադրական փոփոխությունների գործընթացը։ ՀՀ Ազգային ժողովում կարծիք հայտնեց «Պատիվ ունեմ» խմբակցության ղեկավար Հայկ Մամիջանյանը։
Ըստ նրա` ՀՀ–ում օդում կախված մի տագնապ կա ու մի հարց` այս ամենի վերջն ի՞նչ է լինելու։
«Իրականում վերջը մոտ է, պարզապես կա՛մ Փաշինյանի վերջն է մոտ, կա՛մ ՀՀ–ի։ Շատ է քննարկվում սահմանադրական փոփոխությունների օրակարգը, որը, իմ համեստ կարծիքով, Փաշինյանը մինչև ավարտ չի հասցնի։ Ըստ օդում կախված լուրերի` այդ գործընթացին շարունակություն տալու դեպքում Փաշինյանը նախատեսում է Սահմանադրության մեջ ամրագրել արտադաշինքային տրամաբանություն, այսինքն` սահմանադրորեն արգելել ՀՀ–ին մաս կազմել որևէ ռազմաքաղաքական կառույցի»,– հայտարարեց նա։
Անդրադառնալով Ուկրաինայի նախագահ Վլադիմիր Զելենսկու` ՀՀ այցի մասին լուրերին` Մամիջանյանն ասաց, որ իրեն ավելի շատ հետաքրքրել է ՀՀ–ում Ուրկրաինայի գործերի ժամանակավոր հավարտարմատարի` այս օրերին արած հայտարարությունը։
«Նա ասել էր, որ մոտ ժամանակներս ՀՀ–ին մեծ ու կարևոր իրադարձություններ են սպասվում։ Այստեղից կարո՞ղ ենք հետևություն անել, որ դուք նախաձեռնում եք Ուկրաինային տալ ՀՀ–ի և Ադրբեջանի միջև միջնորդական իրավունք կամ պարտականություն։ ՀՀ–ում շատ վաղուց է ամեն ինչ կառավարվում sms–ների միջոցով, այդ պատճառով մեկին ասեք` թող գա իմ ասածները կա՛մ հերքի, կա՛մ հաստատի»,– նշեց Մամիջանյանը։
Նա հավելեց` այսօր դժվար թե գտնվի մեկը, որը կհավատա այսօրվա իշխանության խոսքերին։
Նշենք, որ Ուկրաինայի նախագահի հնարավոր այցի մասին տեղեկությունը հայտնվել է Երևանի և Մոսկվայի հարաբերություններում լարվածության նկատելի աճի ֆոնին։ Ավելի վաղ վարչապետ Նիկոլ Փաշինյանը France24-ին տված հարցազրույցում հայտարարել էր, որ Հայաստանը սառեցրել է իր մասնակցությունը Հավաքական անվտանգության պայմանագրի կազմակերպության աշխատանքներին, քանի որ կազմակերպությունը չի կատարել իր պարտավորությունները երկրի հանդեպ: Բացի այդ, նա ռուս բարձրաստիճան անձանց մեղադրել է այն բանում, որ 2023 թվականի աշնանը նրանք հայ ժողովրդին իբր բացահայտ կոչ էին անում տապալել սեփական իշխանությունը։