ԵՐԵՎԱՆ, 19 փետրվարի – Sputnik․ ՀՀ ՊՆ տեղեկատվության և հասարակայնության հետ կապերի վարչության նախկին պետ Գևորգ Ալթունյանի նկատմամբ տնային կալանքը ևս երկու ամսով երկարաձգելու միջնորդությունը Հակակոռուպցիոն դատարանը մերժել է․ Ալթունյանն ազատության մեջ է: Sputnik Արմենիայի հետ զրույցում տեղեկությունը հայտնեց նրա փաստաբան Սիրանուշ Սահակյանը։
Դատարանի որոշմամբ՝ Ալթունյանի նկատմամբ կիրառվել է 20 մլն դրամ գրավ և ստորագրություն՝ չբացակայելու մասին։
Նշենք, որ Գևորգ Ալթունյանի նկատմամբ խափանման միջոց էր կիրառվել տնային կալանքը, 1 ամիս անց խափանման միջոցը փոխարինվել էր կալանքով։ 2 ամիս կալանքից հետո խափանման միջոցը կրկին փոխարինվել էր տնային կալանքով։
Սահակյանի խոսքով՝ իր պաշտպանյալն ընդհանուր առմամբ 5 ամիս ազատությունից զրկված է եղել։
«Քանի որ ի սկզբանե կալանավորվել է, տևական ժամանակ գտնվել է տնային կալանքի ներքո, մենք կարծում ենք, որ անձնական ազատության իրավունքի խախտում գոյություն ունի և նախորդ կալանավորումների առնչությամբ դեռևս անցյալ տարի գանգատ ենք ներկայացրել ՄԻԵԴ, շարունակաբար այլ գանգատներ էլ պետք է ներկայացնենք կալանքների մասով»,- ասաց Սահակյանը։
Հիշեցնենք, որ Ալթունյանն ու ևս 4 անձ, այդ թվում՝ Dasaran.am կայքի հիմնադիր Սուրեն Ալոյանը, մեղադրվում են ՊՆ գնումների գործընթացի արդյունքում փաստաթղթերում կեղծ տեղեկություններ զետեղելու եղանակով պետությունից 106 մլն 300 հազար դրամ հափշտակելու մեջ։ Նրանք իրենց առաջադրված մեղադրանքները չեն ընդունում։