Մեժլում Մեժլումյանը ազատ ոճի ըմբաշամարտի Եվրոպայի առաջնությունը անհաջող սկսեց։ Մեր ըմբիշը 1/8 եզրափակիչում պարտվեց Ալբանիան ներկայացնող Զելիմխան Աբակարովին։ Բայց քանի որ վերջինս հասավ եզրափակիչ, մեր ըմբիշը իրավունք ստացավ սփոփիչ գոտեմարտի միջոցով պայքարելու բրոնզե մեդալի համար։
Սփոփիչ գոտեմարտում Մեժլումյանը համառ ու ծանր պայքարում կարողացավ 6։5 հաշվով հաղթանակի հասնել վրացի Շոթա Ֆերտենաձեի նկատմամբ, ու բրոնզե մեդալի համար գոտեմարտեց գերմանացի Նիկլաս Շտեխելեի հետ։
Մեժլումյանը շատ գրագետ գոտեմարտ անցկացրեց ու աստիճանաբար միավորներ վաստակելով` վճռեց գոտեմարտի ելքը իր օգտին։ Հայ ըմբիշը հաղթանակ տարավ 7։5 հաշվով ու դարձավ Եվրոպայի առաջնության բրոնզե մեդալակիր։
Այսպիսով, ինչպես և հունահռոմեական ոճի Հայաստանի հավաքականը, ազատ ոճի հավաքականը նույնպես Եվրոպայի առաջնությունում նվաճեց երկու ոսկե և մեկ բրոնզե մեդալ։