Երևանում բռնկված խոշոր հրդեհի հետևանքով տուժածներ չկան․ ՆԳՆ

ԵՐԵՎԱՆ, 10 փետրվարի – Sputnik․Երևանի Թբիլիսյան խճուղիում գտնվող պահեստային տարածքում բռնկված խոշոր հրդեհի հետևանքով տուժածներ չկան։ Sputnik Արմենիայի հետ զրույցում տեղեկությունը հայտնեցին ՆԳՆ-ից։

Գերատեսչությունն ավելի վաղ հայտնել էր, որ հրդեհը բռնկվել է մոտավորապես 09:40-ին, դեպքի վայր է մեկնել 12 մարտական հաշվարկ։

Sputnik Արմենիայի թղթակիցը հրդեհի վայրից տեղեկացնում է, որ պահեստային տարածքը կամ առնվազն դրա մի մասը շահագործվում է «Գրին լայֆ» ՍՊԸ-ի կողմից։ Հրդեհի վայրում երևում է ընկերության բեռնատարը։ Նշենք, որ «Գրին լայֆը» զբաղվում է գյուղատնտեսական ապրանքների վաճառքով։

Տարածքն այս պահին սահմանազատված է։ Հրդեհաշիջման աշխատանքները շարունակվում են, առայժմ հրդեհը մարված չէ։

Sputnik Արմենիայի կադրերում երևում է, որ հրշեջներից մեկին օգնություն են ցուցաբերում տեղում աշխատող շտապօգնության բժիշկները։