Ռուսաստանն ու Ուկրաինան վաղ թե ուշ համաձայնության կգան, ժողովուրդների միջև հարաբերությունները, միևնույն է, կվերականգնվեն, թեև դրա համար երկար ժամանակ կպահանջվի, հայտարարել է ՌԴ նախագահ Վլադիմիր Պուտինը:
Պուտինի հարցազրույցն ամերիկացի հայտնի լրագրող Թաքեր Կառլսոնին հրապարակվել է Կրեմլի կայքում:
«Ծիծաղելի կլիներ, եթե այդքան տխուր չլիներ։ Այս անվերջանալի մոբիլիզացիան Ուկրաինայում, հիստերիան, ներքին խնդիրները... վաղ թե ուշ, միևնույն է, մենք համաձայնության կգանք։ Եվ գիտեք ինչ: Գուցե նույնիսկ տարօրինակ հնչի այսօրվա իրավիճակում, բայց միևնույն է, ժողովուրդների միջև հարաբերությունները կվերականգնվեն։ Շատ ժամանակ կպահանջվի, բայց դա կվերականգնվի», - ասել է նա։
ՌԴ նախագահն ընդգծել է, որ ուկրաինացիները մինչև հիմա իրենց ռուս են զգում։ Այն, ինչ տեղի է ունենում, քաղաքացիական պատերազմի տարր է։ Հավելել է` «Ուկրաինա» անվանումը հորինել են լեհերը, որոնք լեհ-լիտվական պետության մեջ մտած հարավային ռուսական հողերը սահմանամերձ էին համարում`окраиной։
Նրա խոսքով՝ Ուկրաինայի հետ բանակցությունները 2022 թվականին գործնականում ավարտվել էին, սակայն Կիևից ռուսական զորքերի դուրսբերումից հետո ուկրաինական կողմը անտեսել է բոլոր պայմանավորվածությունները։
ՌԴ նախագահը հիշեցրել է, որ Վլադիմիր Զելենսկին ավելի հեռուն է գնացել և օրենսդրորեն արգելել է բոլորին բանակցել Ռուսաստանի հետ։
«Ինչպե՞ս ենք բանակցելու, եթե ինքն իրեն և բոլորին է արգելել։ Մենք գիտենք, որ նա ինչ-որ գաղափարներ է առաջ քաշում այդ կարգավորման վերաբերյալ։ Բայց ինչ-որ բանի մասին պայմանավորվելու համար պետք է երկխոսություն սկսել, այնպես չէ՞»,- նշել է ՌԴ նախագահը։
Պուտինը հայտարարել է, որ Արևմուտքում կարծում են, թե Ուկրաինայում ռազմական գործողությունները ռուս ժողովրդի մի մասին ընդմիշտ հեռացրել են մյուսից, բայց վերամիավորում տեղի կունենա։
Նա ավելացրել է, որ «ուկրաինական իշխանությունները մաս-մաս են անում Ռուս ուղղափառ եկեղեցին», քանի որ այն միավորում է ոչ թե տարածքները, այլ հոգիները, և ոչ մեկին չի հաջողվի հոգին բաժանել։