ԵՐԵՎԱՆ, 9 փետրվարի – Sputnik. Հայաստանի Հանրապետական կուսակցության փոխնախագահ, կրթության և գիտության նախկին նախարար Արմեն Աշոտյանի և մյուսների գործով դատական նիստը հետաձգվեց։ Փաստաբան Ռուբեն Մելիքյանը նշեց, որ պետք չէ այսօրվա նիստի հետաձգման մեջ դատարանին մեղադրել։
«Այն հետաձգվեց ոչ դատարանի, ոչ էլ մեղադրող կողմի պատճառով։ Պատճառն այն է, որ մեղադրյալներից մեկն առողջական խնդիր ունի։ Առողջություն եմ մաղթում նրան, բայց հենց այդ մեղադրյալն առաջին դատական նիստին նույնպես չէր ներկայացել։ Դատարանն այդ ժամանակ նիստը շարունակեց, որովհետև պետք է Աշոտյանի կալանքի հարցը լուծվեր այդ օրը։ Ասելիք չունենք. որ անհրաժեշտ է լինում, լավ էլ շարունակում են նիստը։ Կալանքի հարց որ լիներ, վստահ եմ` կշարունակեին»,– ասաց Մելիքյանը։
Նշենք, որ Աշոտյանը և Երևանի Հերացու անվան բժշկական համալսարանի նախկին ռեկտոր Միքայել Նարիմանյանը մեղադրվում են բուհին պատկանող մոտ 100 հազար դոլարի գույք հափշտակելու մեջ: Նրանց մեղադրում են «Ծովասար» հյուրանոցային համալիրի քոթեջները ուռճացված գներով (հաջորդած «ատկատներով») ձեռք բերելու համար այն ժամանակահատվածում, երբ ՀՀԿ փոխնախագահը գլխավորել է բուհի հոգաբարձուների խորհուրդը:
Արմեն Աշոտյանը կալանքի տակ է 2023–ի հունիսի 16–ից։
ՀՀ հակակոռուպցիոն դատարանը 2024–ի հունվարի 8–ի դատական նիստում անփոփոխ թողեց Արմեն Աշոտյանի խափանման միջոցը` կալանքը։