ԵՐԵՎԱՆ, 7 փետրվարի – Sputnik. Հայաստանի բանկերը չեն ներում օվերդրաֆտի պարտքերը Լեռնային Ղարաբաղից բռնի տեղահանված հայրենակիցներին ու նրանց բանկային քարտերից անգամ սոցիալական աջակցության գումարներն են գանձում։ Այս մասին կառավարության հետ հարցուպատասխանի ժամանակ հայտարարեց «Քաղաքացիական պայմանագիր» խմբակցության պատգամավոր Վահագն Ալեքսանյանը։ Նա ընդգծեց, որ շատ արցախցիներ են դիմում իրենց այդ հարցով։
ՀՀ ԱԺ–ն օրենք էր ընդունել, համաձայն որի, Ֆինանսների նախարարությունը պարտապաններին ազատել է այդ վարկերի վերաբերյալ բանկերի պահանջներից։
Պատգամավորը շեշտեց, որ չնայած այդ օրենքին, բանկերը շարունակում են գանձել քաղաքացիների գումարներն անգամ սոցիալական աջակցության հաշվին։
Ի պատասխան ՀՀ ֆինանսների նախարար Վահե Հովհաննիսյանը հիշեցրեց, որ նշված օրենքով կառավարությունը չի ստանձնում անգրավ վարկեր, որոնց շարքին է դասվում նաև օվերդրաֆտը։
«Անգրավ վարկերն այդքան էլ լեգիտիմ չեն, համարել ենք, որ դրանք չեն կարող ընդունվել որպես մարման ենթակա։ Սպառողական վարկերը մենք ծածկում ենք, օվերդրաֆտը` ոչ»,– ընդգծեց նախարարը։
Ալեքսանյանը, սակայն, չհամաձայնեց նման դիրքորոշման հետ` ընդգծելով, որ օվերդրաֆտ տեսակի վարկը Հայաստանի բանկային համակարգից օգտվող գրեթե յուրաքանչյուր աշխատող քաղաքացի կարող է ստանալ աշխատավարձի եռապատիկի չափով, և դա տարածված բան է։
Վահե Հովհաննիսյանը շեշտեց, որ իրավական հարց է` արդյոք բանկերն իրենց հայեցողությամբ կարող են արցախցիների քարտերից գանձել սոցաջակցության գումարները, թե դրանք պետք է դարձնել անձեռնմխելի։ Ֆինանսների նախարարն ասաց, որ այդ հարցը պետք է քննարկել` հասկանալու իրավաչափությունը։
Նա ընդգծեց, որ գուցե պետք է փոխել օվերդրաֆտի առնչությամբ դիրքորոշումը, բայց այդ դեպքում հարցը պետք է ԱԺ–ում է քննարկվի։