ԵՐԵՎԱՆ, 17 հունվարի – Sputnik. Բնակարաններով ապահովման ծրագիրը վերաբերվելու է ոչ միայն 2023–ի սեպտեմբերյան դեպքերից հետո Լեռնային Ղարաբաղից բռնի տեղահանված, այլև 2020–ի 44-օրյա պատերազմի հետևանքով բռնի տեղահանվածներին։ Այսօր Ազգային ժողովում կառավարության հետ հարցուպատասխանի ժամանակ այս մասին հայտարարեց ՀՀ վարչապետ Նիկոլ Փաշինյանը։
«Քանի որ թեման շատ լուրջ է, մենք մեկ շաբաթվա ընթացքում մեծ խորհդակցություն կհրավիրենք և այդ ընթացքում կկայացնենք վերջնական որոշումներ, ծրագրին ընթացք կտանք»,- ասաց վարչապետը։
Նրա խոսքով՝ եթե մինչև այժմ տարբեր ժամանակներում տեղահանված մեր հայրենակիցների համար ծրագրերում որոշակի տարբերակում էր արվում, ապա հիմա տրամաբանությունն այն է, որ ծրագրերը պետք է նույնական լինեն։
Հիշեցնենք` Ադրբեջանը սեպտեմբերի 19–ին լայնամասշտաբ հարձակում սկսեց Արցախի դեմ։ Ըստ տեղեկությունների` ադրբեջանական ագրեսիայի զոհերի թիվը գերազանցում է 220-ը։
Սեպտեմբերի 20–ին Արցախի իշխանությունն ընդունեց կրակի դադարեցման վերաբերյալ առաջարկությունը: Սեպտեմբերի 21–ին Ստեփանակերտի ու Բաքվի ներկայացուցիչները հանդիպեցին Եվլախում, սեպտեմբերի 25–ին` Իվանյանում, սեպտեմբերի 29-ին` կրկին Եվլախում։ Սեպտեմբերի 24-ին սկսվեց արցախցիների բռնի տեղահանումը։
Սեպտեմբերի 28–ին Արցախի նախագահ Սամվել Շահրամանյանը հրամանագիր ստորագրեց, ըստ որի` Արցախի Հանրապետությունը 2024 թվականի հունվարի 1-ից կդադարի գոյություն ունենալ։
Վերջին տվյալներով` ՀՀ–ում Արցախից բռնի տեղահանված 101 848 անձ է հաշվառվել և նույնականացվել։