ԵՐԵՎԱՆ, 13 հունվարի – Sputnik. ԱՄՆ Պետդեպարտամենտը հաստատել է Ուկրաինայում բանտարկված և ԱՄՆ-ի ու Չիլիի քաղաքացիություն ունեցող լրագրող և բլոգեր Գոնսալո Լիրայի մահվան լուրը։
«Մենք հաստատում ենք, որ Ուկրաինայում ԱՄՆ քաղաքացի է մահացել։ Խորապես ցավակցում ենք նրա ընտանիքին»,- ՏԱՍՍ-ին ասել են ԱՄՆ արտաքին քաղաքական գերատեսչությունից՝ մեկնաբանելով տեղեկությունն այն մասին, որ Լիրան մահացել է կալանավայրում։
Պետդեպարտամենտից նշել են, որ պատրաստ են պատշաճ հյուպատոսական աջակցություն ցուցաբերել լրագրողի ընտանիքին:
Ըստ առկա տեղեկությունների՝ Լիրան 2023 թվականի հոկտեմբերին հիվանդացել է երկկողմանի թոքաբորբով։ Դա երևում է լրագրողի գրությունից, որը նրա հայրը՝ Գոնսալո Լիրան, տրամադրել էր ամերիկյան «Grayzone» հարթակին։ Վերջինս երեկ հրապարակել է այդ փաստաթղթի լուսանկարը։
Հոր վկայությամբ՝ բանտի վարչակազմը փորձել է լրագրողի ընտանիքից և փաստաբաններից թաքցնել նրա հիվանդության փաստը։ Հայրը Կիևում ամերիկյան դեսպանատնից պահանջել է միջամտել իրավիճակին։ Սակայն դիվանագիտական ներկայացուցչությունը, նրա խոսքով, ոչ մի ջանք չի գործադրել այդ ուղղությամբ։
Պետդեպարտամենտից չեն հստակեցրել` ամերիկյան կառավարությունը որևէ քայլ արել այդ ուղղությամբ, թե ոչ։
«Ես չեմ կարող հաշտվել այն բանի հետ, թե ինչպես է մահացել որդիս։ Նրան խոշտանգել են, շանտաժի ենթարկել, լիակատար մեկուսացման մեջ պահել ութ ամիս և 11 օր, և ԱՄՆ դեսպանատունը ոչինչ չի ձեռնարկել նրան օգնելու համար: Այս ողբերգության պատասխանատվությունն ընկնում է բռնապետ Զելենսկու վրա՝ ԱՄՆ ծեր նախագահ Ջո Բայդենի համաձայնությամբ»,- ասել է մահացածի հայրը։
Նշենք, որ Լիրայի մահվան մասին երեկ հայտնել էր ամերիկացի հեռուստահաղորդավար Թաքեր Կարլսոնը։
Իլոն Մասկն ավելի վաղ դիմել էր Ուկրաինայի նախագահ Վլադիմիր Զելենսկուն՝ խնդրելով բացատրել Լիրային ձերբակալելու և կալանքի տակ պահելու հանգամանքները: Մասկն այս թեմայի վերաբերյալ իր կարծիքը հայտնել էր ի պատասխան X-ում (նախկին Twitter-ում) Թաքեր Կարլսոնի հրապարակմանը, ըստ որի` Լիրային ուկրաինական բանտում խոշտանգել են Վլադիմիր Զելենսկուն քննադատելու համար։