Պատվավոր կոչումների չեղարկման նախագիծը կառավարությունն ուղարկեց ԱԺ

ԵՐԵՎԱՆ, 11 հունվարի – Sputnik. Կառավարությունն Ազգային ժողովին առաջարկում է չեղարկել պատվավոր կոչումների համակարգը։ ՀՀ ԱԺ պետական-իրավական հարցերի մշտական հանձնաժողովի հերթական նիստում ՀՀ արդարադատության նախարարի տեղակալ Արմենուհի Հարությունյանը ներկայացրեց «ՀՀ պետական պարգևների և պատվավոր կոչումների մասին» ՀՀ օրենքում փոփոխություններ կատարելու մասին նախագիծը։ Դրանով առաջարկվում է չեղարկել «ժողովրդական» և «վաստակավոր» 17 պատվավոր կոչումները (օրինակ՝ «վաստակավոր լրագրող», «ժողովրդական նկարիչ» և այլն) և ներդնել խրախուսման այլ՝ առավել ժամանակակից ինստիտուտ։

Նրա խոսքով՝ ուսումնասիրվել է առաջադեմ երկրների փորձը, որտեղ պատվավոր կոչումների ինստիտուտ անգամ չկա էլ։ Մասնագետների խրախուսումը չափելի և կոնկրետ արդյունքների վրա է հիմնված լինում, հենվում է ոլորտային մրցանակաբաշխությունների վրա։

«Որևէ կերպ չեն տալիս այդպիսի հնարավորություն մշտապես՝ մինչև կյանքի ավարտն ունենալ «ժողովրդական» կամ «վաստակավոր» կոչում»,- հավելեց Հարությունյանը։

Նախարարի տեղակալի խոսքով՝ կոչումների համակարգը ներմուծվել է խորհրդային ժամանակներում՝ տարբեր անհատների արժանի կամ արժանի տիտղոսավորելու համար, սակայն նաև բազմաթիվ դեպքեր են եղել, երբ անհատը կոչումը ստանալուց հետո դադարել է որևէ կերպ առաջընթաց գրանցել մասնագիտական իր ոլորտում։

Օրենքում առաջարկվող փոփոխություններով պահպանվում է միայն «վաստակավոր կոլեկտիվ» կոչումը, քանի որ, կառավարության հիմնավորմամբ, այն ոչ թե անհատին է շնորհվում, այլ թիմին, այսինքն՝ թիմային ձեռքբերում է։

Հանձնաժողովը ձայների մեծամասնությամբ դրական եզրակացություն տվեց փոփոխությունների նախագծին, ԱԺ խորհրդին կառաջարկվի այն ընդգրկել առաջիկա լիագումար նիստերի օրակարգում։