ԵՐԵՎԱՆ,25 դեկտեմբերի - Sputnik. Եվրասիական տնտեսական միության (ԵԱՏՄ) կողմից Իրանի հետ ազատ առևտրի մասին լիաֆորմատ համաձայնագրի ստորագրումից հետո ռուսական բիզնեսի համար մաքսատուրքերի խնայողությունը կարող է կազմել տարեկան շուրջ 27 մլրդ ռուբլի: Այս մասին ասվում է ՌԴ տնտեսական զարգացման նախարարության տարածած հաղորդագրության մեջ։
Նշվում է` համաձայնագրի պայմանները նախատեսում են, որ Իրանը ԵԱՏՄ երկրներից, այդ թվում ՌԴ–ից ներմուծման ավելի քան 95 տոկոսի համար կկիրառի մաքսատուրքերի արտոնություններ, ինչպես նաև կսահմանի առևտրի կանխատեսելի և թափանցիկ ռեժիմ:
«Մեր համաձայնագրում մենք ոչ միայն կարողացել ենք համաձայնեցնել զրոյական մաքսատուրքերը ռուսական արտահանման զգալի մասի համար, այլև նման ռեժիմը տարածել ապրանքների լայն անվանացանկի վրա ՝ մեր արտահանողներին հնարավորություն տալով դիվերսիֆիկացնել իրենց մատակարարումներն Իրան», - փաստաթղթի ստորագրումը մեկնաբանել է տնտեսական զարգացման նախարար Մաքսիմ Ռեշետնիկովը:
Նշվում է, որ ռուսական բիզնեսի համար մաքսատուրքերի խնայողությունը կարող է կազմել տարեկան մոտ 27 մլրդ ռուբլի:
«Նախկինում Թեհրանն աշխարհի ոչ մի երկրի չի տրամադրել համադրելի զիջումներ թե՛ կարգավորող, թե՛ սակագնային առումով: Բանակցությունների ընթացքում մեզ հաջողվեց ոչ միայն հասնել Իրանի հետ առևտրային միջավայրի զգալի բարելավման, այլև մեր ապրանքների համար իրանական շուկա մուտքի եզակի հասանելիություն ստանալ»,- նշել է ռուս նախարարը։
Հիշեցնենք` ԵԱՏՄ երկրներն այսօր ստորագրել են Իրանի հետ ազատ առևտրի մասին լիաֆորմատ համաձայնագիր, որը պետք է փոխարինի 2019 թվականից գործող ժամանակավոր համաձայնագրին: