ԵՐԵՎԱՆ,19 դեկտեմբեր – Sputnik. Հակակոռուպցիոն դատարանում այսօր կայացած ՀՀԿ փոխնախագահ Արմեն Աշոտյանի գործով դատական նիստին նրա պաշտպանությունը հայտարարեց, որ մեղադրող կողմը տուժող է ճանաչել մի կազմակերպության, որը դադարել է գոյություն ունենալ մինչև իրեն մեղսագրվող հանցագործությունը։
Բացի այդ, պաշտպանությունը հարց է բարձրացնում, թե արդյոք որպես տուժողի օրինական ներկայացուցիչ կարող է հանդես գալ ԵՊԲՀ արհմիության ղեկավար Գալինա Հարությունյանը:
Արմեն Աշոտյանի փաստաբան Ռուբեն Մելիքյանն ուշադրություն հրավիրեց այն փաստի վրա, որ կազմակերպությունը 2017-ին պաշտոնապես փակվել է (քանի որ 5 տարի բանկային հաշվետվություն չի ներկայացրել): Սակայն կազմակերպությունը դադարել էր գոյություն ունենալ ավելի վաղ։ Ապացույցն այն տեղեկությունն է, որը ստացվել է արհմիությունների կոնֆեդերացիայից, որտեղ ընդգրկված էր ԵՊԲՀ արհմիությունը: Այնտեղ Մելիքյանին հայտնել են, որ Գալինա Հարությունյանը ԵՊԲՀ արհմիության ղեկավարի պաշտոնը զբաղեցրել է 2011-2013թթ.–ը։
Հետևաբար, ըստ Մելիքյանի, 2015թ.–ից Աշոտյանին մեղսագրվող գործողությունների շրջանակներում Գալինա Հարությունյանը տուժողի ներկայացուցիչ հանդես գալ չի կարող:
«Այսինքն ՝ ակնհայտ է, որ Հարությունյանը և նախկինում վաղուց գոյություն չունեցող կազմակերպությունը ճանաչվեն տուժող», - ասաց Մելիքյանը:
Աշոտյանի խոսքով ՝ սա ևս մեկ ապացույց է, որ իր հետապնդումը քաղաքական է։
«Եթե չկա տուժող, ապա իրավական առումով գործ չկա, մեղադրանք չկա, հետևանք չկա, մեղավոր չկա։ Փուչիկը միանգամից պայթում է: Պատահական չէ, որ 4 տարի քննություն է գնացել, վերջին պահին են տուժող ճանաչել երկու կազմակերպության, որոնցից մեկը արհմիությունն է։ Սարքելու ինդուստրիա է աշխատել սարքվել է տուժողը, այսինքն` գործը, կներեք, թքած-կպցրած է», – նշեց Աշոտյանը։
Բացի այդ, նիստի ընթացքում ԵՊԲՀ նախկին ռեկտոր Միքայել Նարիմանյանի պաշտպանությունը միջնորդեց վերացնել խափանման միջոցը ՝ չհեռանալու մասին ստորագրությունը և 40 մլն դրամ գրավը (որը Նարիմանյանը դեռ չէր վճարել):
Դատավոր Վահե Դոլմազյանը նշեց, որ թեև Նարիմանյանը գրավը չի վճարել, սակայն մեղադրող կողմը որևէ քայլ չի ձեռնարկել խափանման միջոցը խստացնելու ուղղությամբ: Հետևաբար, մեղադրյալի կողմից գրավի վճարման անհրաժեշտություն չկա։
Նա այդ մասով վերացրեց խափանման միջոցը, սակայն ուժի մեջ թողեց երկրից բացակայելու արգելքը ՝ նշելով, որ այդ սահմանափակումն ամենաքիչն է խախտում Նարիմանյանի իրավունքները:
Արմեն Աշոտյանի գործով հաջորդ դատական նիստը տեղի կունենա 2024 թ.–ի հունվարի 8-ին։
Հիշեցնենք` Արմեն Աշոտյանը երկու ամսով կալանավորվեց հունիսի 16–ին։ Սեպտեմբերի 28–ին Վերաքննիչ հակակոռուպցիոն դատարանի դատավոր Սերգեյ Մարաբյանը մերժեց վերաքննիչ բողոքները և նրան թողեց կալանքի տակ։
Նոյեմբերի 16-ին նույն դատավորի որոշմամբ՝ Արմեն Աշոտյանի պաշտպանների բողոքը մերժվեց, և նրա նկատմամբ կիրառված կալանքը մնաց անփոփոխ։
Աշոտյանը և Երևանի Հերացու անվան բժշկական համալսարանի նախկին ռեկտոր Միքայել Նարիմանյանը մեղադրվում են բուհին պատկանող մոտ 100 հազար դոլարի գույք հափշտակելու մեջ: Նրանց մեղադրում են «Ծովասար» հյուրանոցային համալիրի քոթեջները ուռճացված գներով (հաջորդած «ատկատներով») ձեռք բերելու համար այն ժամանակահատվածում, երբ ՀՀԿ փոխնախագահը գլխավորել է բուհի հոգաբարձուների խորհուրդը: