ԵՐԵՎԱՆ, 19 դեկտեմբերի – Sputnik. Ամերիկացի հայտնի դաշնակահարուհի Լոլա Աստանան, որը հայտնի է ոչ միայն երաժշտական տաղանդի, այլև էպատաժային լինելու շնորհիվ, Երևանում մենահամերգ կտա:
Լոլա Աստանա
© Sputnik / Aram Nersesyan
Երևանում կայացած ասուլիսի ժամանակ դաշնակահարուհին ասաց, որ համերգային ծրագրում ընդգրկված են Ամանորրին նվիրված համարներ, մեծանուն շանսոնյե Շառլ Ազնավուրի երգացանկից կոմպոզիցիաներ, ինչպես նաև սեփական ստեղծագործությունները։
Լոլա Աստանայի ասուլիսը
© Sputnik / Aram Nersesyan
Լոլան վստահ է, որ համերգը կանցնի անկեղծ ու անկաշկանդ մթնոլորտում, իսկ հանդիսատեսը մեծ բավականություն կստանա:
«Հայաստանից շատ բաժանորդներ ունեմ, նրանք գրում էին, որ սպասում են ինձ Երևանում։ Հուսով եմ՝ կհանդիպենք համերգին», - ասել է նա լրագրողներին։
Երաժիշտը խորհրդանշական համարեց, որ համերգը տեղի կունենա Արամ Խաչատուրյանի անվան դահլիճում, քանի որ նա իր սիրելի կոմպոզիտորներից է։ Լոլան խոստովանեց, որ վերջին օրերին շատ է մտածել հայկական մշակույթի մասին։
«Հայաստանում գտնվելու առաջին րոպեներից զգացի, որ երկիրը հյուրընկալ է, ջերմ, հագեցած մշակութային օրակարգով։ Երկիրը փոքր է, բայց ԱՄՆ-ում հանդիպել եմ հայերի, որոնք շատ բանի են հասել, և դա տպավորիչ է», - ասաց նա։
Լոլա Աստանա
© Sputnik / Aram Nersesyan
Դաշնակահարուհին Երևան է ժամանել դեկտեմբերի 18-ին և դեռ չի հասցրել ծանոթանալ հայկական խոհանոցին, սակայն պատրաստվում է անպայման տոլմա և ղափամա համտեսել:
Խոստովանում է, որ անտարբեր չէ սննդի նկատմամբ, թեև նրա կազմվածքից դա բոլորովին չես ասի։
Լոլան նշեց, որ մարզավիճակը պահպանելը ծանր աշխատանք է, և այդ պատճառով ինքը հաճույքով է ընդունում հաճոյախոսությունները:
Ինչ վերաբերում է նրա բեմական կերպարին՝ բաց կարճ զգեստներին և բարձրակրունկներին, ապա նա ինքն է հորինել այն։
«Ուզում էի անել այն, ինչ համապատասխանում է իմ ներքին էսթետիկ վիճակին, բայց ընդունված չէ դասական երաժշտության աշխարհում։ Հիմա աղջիկներն ինձ նմանակում են, և դա շատ հաճելի է», – ասաց նա։
Սակայն Լոլան խոստովանեց, որ ուզում է հիշվել ոչ թե կերպարով, այլ հեղինակային երաժշտությամբ։ Նրա երազանքն է լավ երաժշտություն գրել, որը կհնչի մոլորակի տարբեր անկյուններում։ Դաշնակահարուհին նաև նշեց, որ մտադիր է հեռանալ սովորական ժանրից։ Չի բացառվում, որ շուտով նրան կտեսնենք երգչուհու բոլորովին այլ դերում։
Sputnik Արմենիայի հարցին, թե հնարավո՞ր է` շարունակի ելույթները հայտնի թավջութակահար HAUSER –ի հետ, նա պատասխանեց, որ նման ծրագրեր դեռ չկան։ Ինչ վերաբերում է նախկինում նրանց համագործակցությանը, ապա խորվաթ երաժիշտն ինքն է առաջարկել համագործակցություն, որը ոչ միայն հաջող էր, այլև հաճելի։
Լոլայի խոսքով՝ թեև իրենց ստեղծագործական ուղիները բաժանվել են, երաժիշտները պահպանում են ջերմ ընկերական հարաբերությունները: