ԵՐԵՎԱՆ, 19 դեկտեմբերի – Sputnik. Հավաքական անվտանգության պայմանագրի կազմակերպության Խորհրդարանական վեհաժողովի (ՀԱՊԿ ԽՎ) խորհուրդը հայտարարություն է ընդունել աղքատացված ուրանով զինամթերքի կիրառման հետևանքների մասին:
Հայտարարության մեջ նշվում է, որ ՀԱՊԿ-ը ելնում է ոչ միայն տարածաշրջանային, այլև գլոբալ անվտանգության ապահովման անհրաժեշտությունից, և վնասակար տեխնոլոգիաների և սպառազինությունների կիրառման կանխարգելման կողմնակից է։
«Ելնում ենք մարդու և շրջակա միջավայրի համար հնարավոր ռադիոլոգիական սպառնալիքից, որը կապված է ռազմական նպատակներով աղքատացված ուրանի հետ զինամթերքի օգտագործման ու դրանով տարածքների աղտոտման հետ», - նշված է ՀԱՊԿ ԽՎ Խորհրդի հայտարարության մեջ:
ՀԱՊԿ խորհրդարանականները նշում են, որ զինամթերքում օգտագործվող քայքայված ուրանի չափազանց բարձր խտությունը և կիսատրոհման զգալի ժամանակահատվածը նման զինամթերքը դարձնում են անխտիր ազդեցություն ունեցողի:
«Ակնհայտ ենք համարում մարդկանց, շրջակա միջավայրի և կենդանիների համար համապատասխան զինամթերքի կիրառման հետևանքով աղքատացված ուրանի մանր մասնիկներով տարածքի ռադիոակտիվ աղտոտման վնասը», - նշված է հայտարարության մեջ:
Խորհրդարանականները նաև ուշադրություն են հրավիրում պատմական նախադեպերին, մասնագետների գնահատականներին և կանխատեսումներին, որոնք բացահայտում են աղքատացված ուրանով զինամթերքի օգտագործման հնարավոր վտանգը, նախազգուշացնում շրջակա միջավայրի ռադիոակտիվ աղտոտման հետևանքով առաջացած բնապահպանական, հումանիտար և տեխնածին հետևանքների մասին:
Նրանք նաև խոսում են աղքատացված ուրանի օգտագործման հետևանքների լրացուցիչ գիտական ուսումնասիրության անհրաժեշտության մասին՝ անվտանգության միջազգային ստանդարտների և սահմանափակումների ձևավորման նպատակով:
Մոսկվայում դեկտեմբերի 19-ին ընթանում է ՀԱՊԿ Խորհրդարանական վեհաժողովի խորհրդի և 16-րդ լիագումար համատեղ նիստը: Հայաստանն ավելի վաղ հրաժարվել էր մասնակցել այդ միջոցառումներին։
ՀԱՊԿ-ին անդամակցում է 6 երկիր՝ Հայաստանը, Բելառուսը, Ռուսաստանը, Ղազախստանը, Ղրղզստանը, Տաջիկստանը: