ԵՐԵՎԱՆ, 16 դեկտեմբերի – Sputnik. Հունգարիայի արտգործնախարար Պետեր Սիյարտոն կասկածում է, որ Կիևը կկատարի ազգային փոքրամասնությունների մասին օրենքը, որը վերջերս է ընդունվել։ Տեղեկությունը հայտնում է ՌԻԱ Նովոստին։
«Ես մեծ նշանակություն չեմ տալիս այն փաստին, որ Ուկրաինայի խորհրդարանն ինչ-որ օրենք է ընդունել, որովհետև հարց է` ինչպես է այդ օրենքն իրականացվելու և իրականացվելո՞ւ է արդյոք», - ասել է Սիյարտոն «Mandiner»–ի հետ զրույցում։
Դիտարկմանը, թե օրենքը խոստումնալից է, Սիյարտոն պատասխանել է. «Ես այդպես չէի ասի»:
Նրա խոսքով՝ ուկրաինական իշխանությունները 2015 թվականից մշտապես ոտնահարում են անդրկարպատյան հունգարացիների և այլ ազգային փոքրամասնությունների իրավունքները:
«Չգիտեմ, թե Ուկրաինայի քանի արտգործնախարարի հետ եմ աշխատել, բայց բոլորի հետ բանակցել եմ այդ մասին` խնդրում եմ` վերադարձրեք իրավունքները ։ Ութ տարի միայն խլեցին իրավունքները։ Ութ տարի։ Հիմա խորհրդարանական որոշում է ի հայտ գալիս, և արդյոք պե՞տք է հավատալ, որ չորս օրում կարելի է փակագծերից հանել ութ տարին»,- նշել է Հունգարիայի ԱԳՆ ղեկավարը։
Ավելի վաղ Ուկրաինայի խորհրդարանն օրենք էր ընդունել ազգային փոքրամասնությունների իրավունքների ընդլայնման մասին, մասնավորապես վերականգվել է փոքրամասնությունների ներկայացուցիչների համար մայրենի լեզվով հիմնական և հատուկ միջնակարգ կրթություն ստանալու հնարավորությունը, եթե դա ԵՄ լեզուներից մեկն է: Հունգարիայի ԱԳՆ-ում հայտարարել են, որ ուշիուշով կգնահատեն ազգային փոքրամասնությունների իրավունքների մասին ուկրաինական նոր օրենքը և դրա կատարումը, սակայն արդեն իսկ ակնհայտ է, որ այն չի համապատասխանում Բուդապեշտի պահանջներին: