Բելառուսի նախագահ Ալեքսանդր Լուկաշենկոն հայտարարել է, որ ղարաբաղյան հակամարտության սրացում տեղի չէր ունենա, եթե կողմերը ժամանակին ականջալուր լինեին խորհուրդներին և անհրաժեշտ միջոցներ ձեռնարկեին: Նա այս մասին ասել է ԱՊՀ մասնակից պետությունների անվտանգության մարմինների և հետախուզական ծառայությունների ղեկավարների խորհրդակցության 19-րդ նիստին մասնակցող պատվիրակությունների ղեկավարների հետ հանդիպմանը:
«Այո, ինչ-որ տեղ սխալներ ենթույլ տվել։ Այո, ինչ-որ տեղ չստացվեց Հայաստանում, Ադրբեջանում։ Եկեք շտկենք դա», - ասել է նա:
Լուկաշենկոն նշել է, որ տեղի ունեցածում ՀՀ վարչապետ Նիկոլ Փաշինյանի մեղքը չկա: Նրա խոսքով՝ ստեղծված իրավիճակն իրեն «ժառանգություն» է հասել։ Նա հիշեցրել է Հայաստանի նախկին նախագահ Սերժ Սարգսյանի և Ադրբեջանի նախագահ Իլհամ Ալիևի հետ իր զրույցի մասին, երբ վերջինս 5 մլրդ դոլար էր առաջարկում հինգ շրջանների դիմաց, իսկ Հայաստանի նախագահը չընդունեց նրա առաջարկը:
«Եթե համաձայնեին, այդ պատերազմը սանձազերծելու առիթ անգամ չէր լինի։ Ամեն ինչի մասին կպայմանավորվեին։ Ինչո՞ւ այն ժամանակ չարեցին։ Չարեցին՝ ստացան։ Ի՞նչ է, Հայաստանի համար ավելի լավ եղա՞վ։ Ադրբեջանի համար էլ հեշտ չէ։ Իլհամն այդ առումով խելացի մարդ է», - ասելէ Բելառուսի առաջնորդը։
Նա նաև հայտնել է, որ վերջերս Դուբայում շփվել է ադրբեջանցի գործընկերոջ հետ, քննարկել է նրա հետ ղարաբաղյան հարցը և բնակչության տեղահանությունը:
«Ասում է՝ ոչ ոքի ձեռք չենք տա։ Մենք, ընդհակառակը, այնպես կանենք, որ բոլորը հասկանան, որ մենք քաղաքակիրթ երկիր ենք։ Մենք կօգնենք սոցիալ-կենցաղային մակարդակում։ Իշխանությունն այնտեղ ուժեղ է, նրանք կարող են դա անել՝ և՛ աջակցել, և՛ օգնել», – ասել է Լուկաշենկոն։
Հիշեցնենք, որ Լեռնային Ղարաբաղի դեմ Ադրբեջանի ռազմական ագրեսիայի հետևանքով այնտեղից Հայաստանի Հանրապետություն բռնի տեղահանվել է 101 848 մարդ: