ԵՐԵՎԱՆ, 13 դեկտեմբերի – Sputnik. Խուլիգանության համար մեղադրվող օտարերկրացի թրեշ–բլոգեր Յուլյա Ֆինեսը` Յուլյա Մաքսիմովսկայան, քննչական բաժնի զուգարանի պատուհանից փախուստի փորձ է կատարել։ Այս մասին տեղեկանում ենք ՀՀ քննչական կոմիտեի լրատվական ծառայությունից։
Նշենք, որ օտարերկրացի թրեշ–բլոգեր Յուլյա Ֆինեսի և մի «տղամարդու» մասնակցությամբ համացանցում տեսանյութեր էին տարածվել, որտեղ նրանք Երևանի կենտրոնում վնասում են ծաղկավաճառի գույքը, մրգեր նետում ֆրեշի վաճառողուհու ուղղությամբ, ծաղրում տարեց կնոջը, հնչեցնում հայհոյանքներ, դրսևորում անպարկեշտ վարքագիծ: Նրանք ձերբակալվել էին դեկտեմբերի 8–ին։
Նշվում է, որ Մաքսիմովսկայան նույն քրեական վարույթով ձերբակալվածի հետ առերես հարցաքննությունից հետո խնդրել է գնալ զուգարան։ Քննիչները նրան ուղեկցել են քննչական բաժնի աղջիկների համար նախատեսված զուգարան և սպասել դռան դիմաց:
«Մտնելով ներս՝ Յ. Մաքսիմովսկայան զուգարանում առկա փոքր պատուհանից փորձել է դիմել փախուստի և ընկել ՀՀ ՆԳՆ ոստիկանության՝ ձերբակալված անձանց պահելու վայրի զբոսանքի համար նախատեսված հատվածում առկա ցանցե տանիքին՝ ստանալով մարմնական վնասվածք»,–նշվում է հաղորդագրության մեջ:
Յու.Մաքսիմովսկայան տեղափոխվել է Էրեբունի բժշկական կենտրոն, որտեղ ախտորոշվել է L2 և L3 ողերի մարմինների կոմպրեսիոն կոտրվածք
Դեպքի առթիվ նախաձեռնվել է քրեական վարույթ` արգելանքի վերցված, ձերբակալված, կալանավորված կամ քրեակատարողական հիմնարկում պատիժ կրող անձի փախուստը կամ պատիժը կրելուց խուսափելը հոդվածով։