Պետք է կոտրել այն կարծրատիպը, թե Հայաստանն անվտանգ երկիր չէ ճամփորդելու համար. Ապրեսյան

ԵՐԵՎԱՆ, 12 դեկտեմբերի – Sputnik. Համաշխարհային զբոսաշրջային շուկայում Հայաստանը շարունակում է մնալ ոչ անվտանգ երկիր, դա է պատճառը, որ երկրում կազմակերպված զբոսաշրջությունը դեռ կայուն զարգացման փուլ չի մտել` չնայած նրան, որ այս տարի Հայաստանն ունեցել է 2,2 մլն զբոսաշրջիկ։ Այսօր հրավիրված ասուլիսի ժամանակ այս հայտարարությունն արեց Տուրիզմի հայկական ֆեդերացիայի նախագահ Մեխակ Ապրեսյանը։

Ապրեսյանի խոսքով` եթե անգամ զբոսաշրջիկներն այցելում են, նրանց խորհուրդ չի տրվում Հայաստանի զգալի մասն այցելել նույն խնդրի պատճառով։

Տուրիզմի հայկական ֆեդերացիայի նախագահն ընդգծեց, որ սփյուռքի ներուժն ու դիվանագիտական խողովակներն օգտագործելով` ամեն ինչ պետք է անել Հայաստանում կազմակերպված տուրիզմը վերականգնելու համար, քանի որ դա է նպաստում կայուն և համաչափ տարածքային տնտեսական զարգացմանը։

«Պետք է կոտրել այն կարծրատիպը, թե Հայաստանն անվտանգ երկիր չէ ճամփորդելու համար»,–ասաց նա։

Ասուլիսին ներկա «Վիզիթ Արմենիա» տուրիստական ընկերության հիմնադիր Վլադիմիր Գևորգյանն էլ իր հերթին ընդգծեց, որ Հայաստան ժամանած զբոսաշրջիկների մեծ մասը հայեր են, որոնք հաճախ գալիս են իրենց բարեկամներին այցելելու համար կամ այստեղ բնակարաններ ունեն։

Նա նշեց, որ այդ անձինք զբոսաշրջային ընկերությունների հաճախորդներ չեն, քանի որ ֆինանսական ներհոսք չեն ապահովում։

Գևորգյանի խոսքով` ստեղծված իրավիճակում շահում են տուրիզմի վերջին օղակները` հանրային սննդի վայրերը, տրանսպորտային ընկերությունները, ժամանցային վայրերը, որոնք միանշանակ ունենում են ֆինանսական ներհոսքեր։

Հավելենք, որ ըստ Զբոսաշրջության կոմիտեի վիճակագրական տվյալների` 2023 թ հունվարից նոյեմբեր ընկած ժամանակահատվածում Հայաստան է այցելել 2,2 մլն զբոսաշրջիկ. 2022 թ համեմատ այս թիվն աճել է 42%–ով: Ամենամեծ թվով զբոսաշրջիկներ Հայաստան են ժամանել Ռուսաստանից, երկրորդ տեղում Վրաստանն է, երրորդում` Իրանը։