ԵՐԵՎԱՆ, 9 դեկտեմբերի – Sputnik. ՀՀ վարչապետ Նիկոլ Փաշինյանը ԿԳՄՍ նախարար Ժաննա Անդրեասյանի հետ Տավուշում ներկա է գտնվել Դիլիջանի վերակառուցված մարզահամալիրի բացման արարողությանը: Տեղեկությունը հայտնում է ՀՀ կառավարության մամուլի ծառայությունը։
Նշվում է, որ ՀՀ վարչապետը շրջել է մարզահամալիրում, ծանոթացել իրականացված շինարարական աշխատանքներին: Դիլիջանի մարզահամալիրը վերջին անգամ նորոգվել էր 2006 թ.։ Փոխվել է շենքի արտաքին և ներքին դիզայնը։ Ձեռք են բերվել նոր մարզական գույք և սարքավորումներ։
Դպրոցում գործելու են ըմբշամարտի, բռնցքամարտի, բազկամարտի, ֆուտբոլի, սեղանի թենիսի և գեղարվեստական մարմնամարզության խմբակներ։ Այժմ դպրոցում կարող է մարզվել ավելի քան 500 մարդ։ Մարզահամալիրն ապահովված է նաև աղջիկների մարզվելու համար նախատեսված գույքով։
Դիլիջանում Փաշինյանն ու ԿԳՄՍ նախարարը ծանոթացել են նաև Հովհաննես Շարամբեյանի անվան թանգարանի Դիլիջանի մասնաճյուղի՝ տարեսկզբին մեկնարկած հիմնանորոգման աշխատանքներին։
Հուշարձան շենքը նախկին տեսքին բերելու ամրակայման, հիմնանորոգման աշխատանքների համար ՀՀ կառավարությունը մոտ 20 մլն դրամ է հատկացրել։
Նախատեսվում է 2024 թ.–ին` թանգարանի 45–ամյակին, վերաբացել այն: