ԵՐԵՎԱՆ, 8 դեկտեմբերի – Sputnik. Լեռնային Ղարաբաղից բռնի տեղահանված անձինք, որոնք պատրաստվում են դիմել մինչև 2 տարեկան երեխայի խնամքի նպաստ ստանալու համար, իրենց դիմումները կկարողանան ներկայացնել դեկտեմբերի 11-ից։ ՀՀ կառավարության հումանիտար կենտրոնում տեղի ունեցած ասուլիսի ժամանակ տեղեկությունը հայտնեց ՀՀ աշխատանքի և սոցիալական հարցերի նախարարի մամուլի խոսնակ Զառա Մանուչարյանը։
«Նպաստները նշանակվելու են նույն սկզբունքով, ինչ ՀՀ օրենսդրությունն է նախատեսել ՀՀ քաղաքացիների համար»,– ասաց նա։
Խոսելով խնամքի նպաստի մասին` Մանուչարյանը շեշտեց, որ կա կարևոր տարբերակում`հաշվի առնելով` երեխան երբ է ծնվել` մինչև 2023 թվականի հունվարի 1-ը, թե դրանից հետո։ Ըստ այդմ` ժամանակավոր պաշտպանություն ստացած փախստականի` մինչև 2023 թվականի հունվարի 1-ը ծնված երեխայի խնամքի կապակցությամբ խնամքի նպաստ կնշանակվի, եթե ծնողը ՀՀ գործատուի մոտ գտնվում է մինչև 3 տարեկան երեխայի խնամքի արձակուրդում և եթե ծնողն ու երեխան հաշվառված են ՀՀ բնակության վայրի հասցեով։
«2023 թվականի հունվարի 1-ին և դրանից հետո ծնված երեխայի խնամքի կապակցությամբ ժամանակավոր պաշտպանություն ստացած հայրենակցին խնամքի նպաստ կնշանակվի անկախ նրանից` ծնողը խնամքի արձակուրդում է, թե ոչ։ Խնամքի չափը որոշելիս այս դեպքում հաշվի կառնվի նրա խնամքի արձակուրդում գտնվելու փաստը։ Ընդ որում` ժամանակավոր պաշտպանություն ստացած փախստականին խնամքի նպաստ է նշանակվում 2023 թվականի հոկտեմբերի 1-ից ոչ շուտ երեխայի և ծնողի` ՀՀ բնակչության պետական ռեգիստրում ՀՀ–ում բնակության վայրի հասցեով հաշվառված լինելու դեպքում»,– նշեց Մանուչարյանը։
Հիշեցնենք` Ադրբեջանը սեպտեմբերի 19–ին լայնամասշտաբ հարձակում սկսեց Արցախի դեմ։ Ըստ տեղեկությունների` ադրբեջանական ագրեսիայի զոհերի թիվը գերազանցում է 220-ը։
Սեպտեմբերի 20–ին Արցախի իշխանությունն ընդունեց կրակի դադարեցման վերաբերյալ առաջարկությունը: Սեպտեմբերի 21–ին Ստեփանակերտի ու Բաքվի ներկայացուցիչները հանդիպեցինԵվլախում, սեպտեմբերի 25–ին` Իվանյանում, սեպտեմբերի 29-ին` կրկինԵվլախում։ Սեպտեմբերի 24-ին սկսվեց արցախցիների բռնի տեղահանումը։
Սեպտեմբերի 28–ին Արցախի նախագահ Սամվել Շահրամանյանը հրամանագիր ստորագրեց, ըստ որի` Արցախի Հանրապետությունը 2024 թվականի հունվարի 1-ից կդադարի գոյություն ունենալ։
Վերջին տվյալներով` ՀՀ–ում Արցախից բռնի տեղահանված 101 848 անձ է հաշվառվել և նույնականացվել։