ԵՐԵՎԱՆ, 5 դեկտեմբերի – Sputnik․ Ավագանու նիստն անօրինական էր․ պնդում է Ալավերդու արդեն նախկին համայնքապետ Արկադի Թամազյանը։ «Երկիր»-ի հետ զրույցում նաա նշեց, որ պատրաստվում է կատարվածը բողոքարկել դատական կարգով։
Նշենք, որ առավոտյան Ալավերդու ավագանու 27 անդամներից 14-ն անվստահություն հայտնեցին Արկադի Թամազյանին և համայնքի ղեկավարի պաշտոնում ընտրեցին ՔՊ խմբակցության ղեկավար Դավիթ Ղումաշյանին։
«Եթե օրենքի ուժով նիստը գումարվում է, 10-10։30 պարտավոր էին սպասել համայնքի ղեկավարին, սակայն մարդիկ, օրենքը խախտելով, երկրորդ անգամ իմպիչմենտ հայտնելով, դուռ ջարդելով մտնում են նիստերի դահլիճ՝ չսպասելով, որ համայնքի ղեկավարը գա»,- ասաց Թամազյանը։
Նա շեշտեց՝ չի պատրաստվում հավաքել իրերն ու դուրս գալ աշխատասենյակից, կսպասի դատարանի որոշմանը։
Թամազյանը նաև հայտնեց, որ իրենք ավելի վաղ դիմել են և՛ կառավարություն, և՛ Լոռու մարզպետարան՝ տեղեկացնելով, որ ավագանու նիստերն արդեն երեք ամիս է՝ չեն կայանում, անհրաժեշտ է դադարեցնել ավագանու ընտրություններն ու նոր ընտրություններ նշանակել, սակայն մինչ օրս պատասխան չկա։
Աշխատակազմի ղեկավար Հարություն Գալստյանը լրագրողների հետ զրույցում հայտնեց, որ իրեն այդպես էլ չի հաջողվել ոչ միայն նիստերի դահլիճ, այլև շենք մուտք գործել, նիստի մասին որևէ արձանագրություն չի կազմվել։
Հավելենք, որ մեծ թվով բնակիչներ շարունակում են համայնքապետարանի շենքի մոտ մնալ՝ պահանջելով չեղյալ համարել ավագանու նիստի արդյունքները։
Հիշեցնենք` 2022–ի սեպտեմբերի 25–ին Ալավերդիում անցկացված ՏԻՄ ընտրություններում «Ապրելու երկիր» և «Քաղաքացիական պայմանագիր» կուսակցությունները ստացել էին 13–ական մանդատ, իսկ «Հայ ազգային կոնգրեսը» չէր հաղթահարել անցողիկ շեմը։ Սակայն ՀԱԿ–ը 1 մանդատ ստացավ, որովհետև, օրենքի համաձայն, համայնքի կառավարումը պետք է կազմված լինի երեք ուժից։
Հոկտեմբերի 12–ին Ալավերդու նորընտիր ավագանու առաջին նիստում «Ապրելու երկիր» կուսակցության թեկնածու Արկադի Թամազյանն Ալավերդու համայնքապետ ընտրվեց։
Հավելենք, որ «Քաղաքացիական պայմանագիր» կուսակցությունից նրա մրցակիցը ԱԺ պատգամավոր Արեն Մկրտչյանն էր։