Երևանում անչափահասի մասնակցությամբ վեճ և դանակահարություն է տեղի ունեցել

ԵՐԵՎԱՆ, 3 դեկտեմբերի – Sputnik. Երևանում անչափահասի մասնակցությամբ վեճ է տեղի ունեցել, որն ավարտվել է դանակահարությամբ։ Տեղեկությունը հայտնում է shamshyan.com–ը։

Նշվում է, որ երեկ` ժամը 19:15-ի սահմաններում «Սուրբ Աստվածամայր» բժշկական կենտրոնից ՀՀ ներքին գործերի նախարարության ոստիկանության Էրեբունու բաժին ահազանգ է ստացվել, որ Երևանի 1-03 շտապօգնության բժիշկների հերթապահ խումբը «պոլիտրավմա» ախտորոշմամբ իրենց մոտ է տեղափոխել տղա երեխա: Կարճ ժամանակ անց նմանատիպ մեկ այլ ահազանգ էլ ստացվում է «Էրեբունի» բժշկական կենտրոնից, որ դանակահարված վիճակում իրենց մոտ է տեղափոխվել մի քաղաքացի:

Ոստիկանները պարզել են, որ նշված անձինք հիվանդանոց են տեղափոխվել «Էրեբունի Մոլ» առևտրի կենտրոնի հետնամասում գտնվող այգուց:

Դեպքի վայրում հայտնաբերվել է BMW մակնիշի ավտոմեքենա, որի սրահում և դրսում՝ արնանման հետքեր:

Դեպքի փաստով Էրեբունի և Նուբարաշեն վարչական շրջանների քննչական բաժնում նախաձեռնվել է քրեական վարույթ: