«Միասին» հասարակական-քաղաքական շարժումն իրազեկման ակցիա է իրականացնում ՀՀ Ազգային ժողովի մոտ։ Օրը պատահական չի ընտրվել․ 1989 թվականի դեկտեմբերի 1-ին Հայկական ԽՍՀ Գերագույն խորհուրդն ու Լեռնային Ղարաբաղի Ազգային խորհուրդը վերամիավորման մասին համատեղ որոշում ընդունեցին։
«Պատմական որոշումից հետո որևէ պետական կամ քաղաքական մարմին այդ որոշումը չի չեղարկել։ Հավաքի նպատակն է հիշեցնել այսօրվա իշխանություններին, որ այդպիսի վերամիավորման որոշումից հետո եղել է ազգային-ազատագրական պայքար, որի շնորհիվ ազատագրվել է Արցախը»,- նշեց Դեմոկրատական կուսակցության նախագահ Արամ Սարգսյանը։
Ըստ նրա՝ որևէ մեկն իրավունք չի տվել Հայաստանի իշխանություններին չեղարկել այս որոշումը կամ համարել, որ Արցախը հայկական տարածք չէ։
Սարգսյանը նշեց, որ վերամիավորման գաղափարը պետք է դրվի մեր նոր ազատագրական պայքարի հիմքում:
Դեմկուսի առաջնորդը նաև հիշեցրեց, որ իրենց շարժումը գործընթաց է սկսում, որով պետք է անվստահություն հայտնեն գործող իշխանությանը։ Առաջիկայում նրանք նախատեսում են մի շարք նման ակցիաներ կազմակերպել ապազգային կառավարությունից ազատվելու նպատակով։
Հիշեցնենք` Ադրբեջանը սեպտեմբերի 19–ին լայնամասշտաբ հարձակում սկսեց Արցախի դեմ։ Ըստ տեղեկությունների` ադրբեջանական ագրեսիայի զոհերի թիվը գերազանցում է 220-ը։
Սեպտեմբերի 20–ին Արցախի իշխանությունն ընդունեց կրակի դադարեցման վերաբերյալ առաջարկությունը: Սեպտեմբերի 21–ին Ստեփանակերտի ու Բաքվի ներկայացուցիչները հանդիպեցինԵվլախում, սեպտեմբերի 25–ին` Իվանյանում, սեպտեմբերի 29-ին` կրկինԵվլախում։ Սեպտեմբերի 24-ին սկսվեց արցախցիների բռնի տեղահանումը։
Սեպտեմբերի 28–ին Արցախի նախագահ Սամվել Շահրամանյանը հրամանագիր ստորագրեց, ըստ որի` Արցախի Հանրապետությունը 2024 թվականի հունվարի 1-ից կդադարի գոյություն ունենալ։
Վերջին տվյալներով` ՀՀ–ում Արցախից բռնի տեղահանված 101 848 անձ է հաշվառվել և նույնականացվել։