ԵՐԵՎԱՆ, 30 նոյեմբերի – Sputnik. Երևանում բնակվող 93–ամյա Վոլոդյա Աղաբաբյանը տարիներ առաջ դժվարությամբ կհավատար, որ տիեզերքի հանդեպ իր անսահման սերը կստիպի 82 տարեկանում նոր մասնագիտություն ձեռք բերել ու աստղադիտակներ պատրաստել։ Հիմա նա այնքան է հմտացել, որ գերհզոր աստղադիտակներ է պատրաստում, որոնցով հնարավոր է դիտել տիեզերական մարմինները։ Sputnik Արմենիայի նկարահանող խումբն այցելել է Վոլոդյա Աղաբաբյանի արհեստանոց և զրուցել նրա անցած ճանապարհի ու ձեռքբերումների մասին։
«82 տարեկան էի, երբ սկսեցի զբաղվել աստղադիտակներով։ Իմ երազանքն էր ունենալ սեփական աստղադիտակ, որով կկարողանամ դիտել լուսնի մակերևույթը, խառնարանները, ամեն ինչ շատ հետաքրքիր էր ինձ համար։ Բայց հնարավորություն չունեի։ Ինտերնետով պատահական ծանոթացա Կեմերովոյի մարզային աստղասերների ակումբի մասնակիցների ու ղեկավարի հետ։ Նրանց շնորհիվ կարողացա օգտվել այն տեխնոլոգիաներից, որոնց միջոցով պատրաստում են աստղադիտակները»,– պատմում է Աղաբաբյանը։
Արդեն 11 տարի է` նա 160 հոգուց բաղկացած այդ խմբի անդամ է` միակ հայը։
Վոլոդյա Աղաբաբյան
© Sputnik / Aram Nersesyan
Վոլոդյա Աղաբաբյանը աստղադիտակների բոլոր դետալներն իր ձեռքով է պատրաստում: Օրինակ` մեկ հայելի պատրաստելը ավելի քան 1 ամիս է տևում։ Հետո տալիս է հայելապատման։ Աստղադիտակ պատրաստելը բարդ գործ է, կարող է ձգվել 1.5 տարի։ Խոստովանում է, որ աստղադիտակներ պատրաստելիս հաճախ է օգտվում համացանցից։
Վոլոդյա Աղաբաբյան
© Sputnik / Aram Nersesyan
Ցուցադրելով աստղադիտակներից մեկը` նա նշում է, որ դա մոտ 300 անգամ մոտեցնում է տիեզերական մարմնի պատկերը։ Լուսնի մակերեսի խառնարանները պարզ երևում են։
Վոլոդյա Աղաբաբյան
© Sputnik / Aram Nersesyan
«Երբ իմ առաջին պատրաստած աստղադիտակով դիտեցի Սատուրնի օղակները, չեմ կարող բառերով ասել, թե ինչ տեղի ունեցավ ինձ հետ։ Դա աննկարագրելի երևույթ էր»,– վերհիշում է նա։
Աղաբաբյանը ցավում է, որ ինքը Հայաստանում միակ աստղադիտակ պատրաստողն է, չկա մեկը, ում հետ կզրուցի, մտքեր կփոխանակի։ Նրան ուրախացնում է միայն այն փաստը, որ կան երիտասարդներ, որոնք ուզում են սովորել, հետաքրքրված են ոլորտով։ Հուսով է` հետագայում իր գործը շարունակողներ կլինեն։
Телескопы Володи Агабабяна
© Sputnik / Aram Nersesyan
Նա մինչ օրս պատրաստել է 14 նյուտոնյան աստղադիտակ։ Դրանցից 8-ը նվիրել է ընկերներին, Ալավերդու թիվ 1 միջնակարգ դպրոցին, զինվորական հոսպիտալի բժիշկներից մեկին։ Իր հավաքածուից մնացել է 5 աստղադիտակ։