ԵՐԵՎԱՆ, 29 նոյեմբերի – Sputnik. Խոշոր ավտովթար է տեղի ունեցել Կոտայքի մարզում, որի հետևանքով 4 անձ տարբեր աստիճանի մարմնական վնասվածքներով հոսպիտալացվել են։ Տեղեկությունը հայտնում է shamshyan.com–ը։
Նշվում է, որ այսօր` ժամը 13:20-ի սահմաններում, Երևան-Սևան ավտոճանապարհի 20-րդ կմ հատվածում բախվել են Range Rover և Volkswagen Vento մակնիշի ավտոմեքենաները: Վթարի հետևանքով 4 հոգի դուրս են բերվել ավտոմեքենաներից և մոտեցվել են շտապօգնության ավտոմեքենաներին։
«Բժիշկները վիրավորներին նախ տեղում առաջին բուժօգնությունն են ցուցաբերել, ապա 2-ին տեղափոխել են «Աբովյան» բժշկական կենտրոն, իսկ 2-ին, որոնք գտնվում էին ծայրահեղ ծանր վիճակում, տեղափոխել են Հերացու անվան թիվ 1 համալսարանական հիվանդանոց»,–գրում է կայքը։
Ավելի ուշ ՆԳՆ փրկարար ծառայությունն էլ տեղեկացրեց, որ Երևան-Սևան ավտոճանապարհի 20-րդ կմ-ին բախվել են «Range Rover» (վարորդ՝ Պ. Ե., ծնված 1988 թ․) և «Volkswagen» մակնիշների ավտոմեքենաները։
Մինչ փրկարարների կանչի վայր հասնելը՝ «Range Rover» մակնիշի ավտոմեքենայից տեղի ուժերով դուրս են բերվել վարորդը և ուղևոր Ս. Ո.-ն (ծնված 1989 թ․), իսկ «Volkswagen» մակնիշի ավտոմեքենայից՝ Ա. Ե.-ն (ծնված 1996 թ․) և Ա. Ե.-ն (ծնված 2000 թ․)․ Պ․ Ե.-ն և Ս․ Ո.-ն տեղափոխվել են բժշկական կենտրոն:
Փրկարարները Ա. Ե.-ին (ծնված 1996 թ․) և Ա. Ե.-ին (ծնված 2000 թ.) մոտեցրել են շտապօգնության ավտոմեքենային, ովքեր հոսպիտալացվել են բժշկական կենտրոն, որտեղ բժիշկները տուժածների առողջական վիճակը գնահատել են ծայրահեղ ծանր։
Խոշոր ավտովթար Կոտայքի մարզում