ԵՐԵՎԱՆ, 28 նոյեմբերի – Sputnik. Մինչև դեկտեմբերի 1-ն անհրաժեշտ է փաստաթղթավորել ՀՀ ներմուծված ավտոմեքենաների օտարման գործարքները։ Զգուշացնում է ՀՀ Պետական եկամուտների կոմիտեի մամուլի ծառայությունը։
Խոսքը վերաբերում է ավտոմեքենաների առևտրով զբաղվող տնտեսվարողների կողմից արդեն իսկ ներմուծված, սակայն դեռևս ՀՀ տարածքում դրանց օտարումը պետական գրանցման չենթարկած տրանսպորտային միջոցներին։ Փաստաթղթավորելու վերջին ժամկետը նոյեմբերի 30-ն է (ներառյալ), քանի որ դեկտեմբերի 1-ից ուժի մեջ են մտնում ՀՀ հարկային օրենսգրքում նախատեսվող փոփոխությունները։
«Տնտեսվարող սուբյեկտների կողմից ՀՀ հարկային օրենսգրքով սահմանված հաշվարկային փաստաթղթերով ավտոմեքենաների օտարման գործարքները փաստաթղթավորվելու դեպքում ՀՀ պետական եկամուտների կոմիտեն զերծ կմնա խիստ վարչարարություն իրականացնելուց` հաշվի առնելով ավտոմեքենաների պետական գրանցման գործընթացում ներկայում առկա օբյեկտիվ ծանրաբեռնվածությունը»,- նշում են ՊԵԿ-ից։
Նոյեմբերի 23-ին ավտոներկրմամբ զբաղվող ընկերությունները բողոքի ակցիա էին իրականացրել կառավարության մոտ՝ 6 ամիս ժամանակ խնդրելով նախքան իրենց նկատմամբ շահութահարկի փոփոխության կիրառումը։
Ավելի վաղ հայտնել էինք, որ դեկտեմբերի 1-ից Հայաստանում ուժի մեջ է մտնում Հարկային օրենսգրքում փոփոխությունների եւ լրացումների նոր փաթեթը, որը շահութահարկ է սահմանում ավտոմեքենաների ներմուծմամբ զբաղվող ընկերությունների համար (նախկինում նրանք վճարում էին շրջանառության հարկ): Ըստ նոր օրենքի` նրանք պետք է ունենան 20 տոկոս շահույթ և դրանից 18 տոկոս վճարեն շահութահարկ և ԱԱՀ։
Այս փոփոխությունները խորհրդարանի կողմից ընդունվել են նոյեմբերի 16-ին: