Երևանում բացվեց «Մեկը 5000-ից» ակումբը. առաջինը արյուն հանձնեց ՀՀ ԿԲ–ի նախագահը

ԵՐԵՎԱՆ, 28 նոյեմբերի – Sputnik. ՀՀ առողջապահության նախարարության Յոլյանի անվան արյունաբանության և ուռուցքաբանության կենտրոնում տեղի ունեցավ «Մեկը 5000-ից» ակումբի պաշտոնական մեկնարկը։ Ակումբը ստեղծվել է, որպեսզի համախմբի բոլոր նրանց, ովքեր պատրաստ են կատարել կանոնավոր արյունատվություն՝ կյանքեր փրկելու համար նվիրաբերելով սեփական արյունը տարեկան 2-4 անգամ։ Ակումբի մեկնարկն ազդարարեց ՀՀ ԿԲ նախագահ Մարտին Գալստյանը, որն էլ դարձավ առաջին անվարձահատույց դոնորը։

«Անվարձահատույց դոնորությունը միշտ է եղել, ուղղակի տոկոսային հարաբերությամբ միշտ զիջել է վճարովի դոնորությանը։ Մոտ մեկ–երկու ամսվա ընթացքում ունեցանք աննախադեպ մի բան` անվճար և վճարովի դոնորությունները դարձան համապատասխանաբան 40 և 60%։ Դա հիմնականում արտագնա արյունատվության շնորհիվ եղավ։ Ես շատ կուզեմ, որ այդ 40%–ը դառնա 50%։ Բնակչության համար դա շատ լավ կլինի»,–ասաց կենտրոնի ղեկավար Սամվել Դանելյանը։

Նրա խոսքով` այժմ մշակվում է նոր ծրագիր, որ հիվանդի հարազատն այլևս չզբաղվի արյուն հայթայթելով։ Ինչպես ընդունված է ամբողջ աշխարհում, դա պետք է լինի այն հիվանդանոցի խնդիրը, որտեղ պետք է իրականացվի արյան փոխներարկումը։

Դանելյանը նշեց` ինչպես ամբողջ աշխարհում, այնպես էլ Հայաստանում արյան դոնորների պահանջը գնալով մեծանում է, բայց արյուն հանձնողների թիվը` կրճատվում, ուստի պետք է միջոցներ ձեռնարկել։

Դանիելյանի խոսքով` իրենք հսկայական ծախսեր են կատարում, մի շարք հետազոտություններ անում, որպեսզի արյունն անվտանգ լինի։

«Երբեմն մարդիկ մեզ մեղադրում են, որ իրենք անվարձահատւյց հանձնում են, մենք վաճառում ենք։ Այո՛, որովհետև գնալով արյան գինը թանկանում է, երբ ձգտում ենք անվտանգության ժամանակակից մեթոդներին։ Հայաստանի դոնորական արյունը համապատասխանում է միջազգային ստանդարտներին»,– ընդգծեց Դանիելյանը։

Շատ մարդիկ կան, որոնք կարող են դոնոր դառնալ, բայց վախենում են արյուն հանձնելուց, քանի որ խուսափում են տարատեսակ վարակներից։ Կենտրոնի ղեկավարն ընդգծեց, որ իրենց մոտ արյուն հաանձնելն անվտանգ է, քանի որ ամեն ինչ մեկանգամյա օգտագործման է։

Դոնոր դառնալու մանրամասներին կարելի է ծանոթանալ այստեղ։