ԵՐԵՎԱՆ, 24 նոյեմբերի – Sputnik. Հայաստանում ընդդիմությունը 2020 թվականից հետո առնվազն 3 անգամ կարող էր հեռացնել գործող իշխանությանը, բայց ընդդիմությունը չկարողացավ ղեկավարել այդ շարժումը։ Այս մասին ՀՀ ազգային ժողովում մեկնարկած «ՀայաՔվե» քաղաքացիական նախաձեռնության առաջադրած օրինագծի հարցով լսումների ժամանակ հայտարարեց ՀՀ ԱԺ նախկին պատգամավոր Ռուբիկ Հակոբյանը («Ժառանգություն» խմբակցություն)։
Նա հայտարարեց, որ համաձայն է, որ այսօրվա իշխանությունը լեգիտիմ չէ, որովհետև կործանում է պետությունը, միայն թե այս ֆոնին որքանո՞վ է լեգիտիմ խորհրդարանական ընդդիմությունը։
«Ընդդիմությունը, որի շարժմանը ես շատ ակտիվ մասնակցել եմ, մանդատ ստացավ և ազգային ժողով մտավ։ Այն եկել էր օր առաջ այս դավաճանին հեռացնելու, Արցախը, Հայաստանը փրկելու համար։ Խնդրում եմ քննարկեք, թե արդյոք խորհրդարանական ընդդիմությունն այսօր լեգիտիմ է, և խնդրում եմ ինձ այդ քննարկմանը հրավիրել»,–ասաց Հակոբյանը։
Նրա խոսքով` որպեսզի հնարավոր լինի Արցախի մասին, «ՀայաՔվեի» մասին խոսել, պետք է նախ փրկել պետությունը, որն այսօր կործանվում է։
««ՀայաՔվե» նախագծի ընդունումն այս պահին որևէ գործնական նշանակություն չի կարող ունենալ, որովհետև այս օրհասական պահին պետք է փրկել պետությունը, որ հետո հնարավորություն լինի այս նախագծերն իրականացնելու։ Ի վերջո, այսօր մենք խոսում ենք հետևանքի մասին, աղետալի հետևանք է նաև այն, որ այսօր բանակցում են, որպեսզի Արարատի նշանը մեր զինանշանից հանվի։ Պատճառը մեկն է` քանի դեռ այս ազգագործան պատուհասն իշխանության է, մենք այսպիսի հետևանքներ ենք ունենալու»,–ասաց Հակոբյանը։
Նա ընդգծեց, որ այսօր իրենք քննադատում ենք իշխանությանը ամեն ինչ նախկինների վրա գցելու համար, բայց նույնն անում է ընդդիմությունը` ամեն ինչ գցելով «Նիկոլի վրա»։ Նա մեղադրեց ընդդիմությանը, որ թույլ են տվել` Նիկոլ Փաշինյանն այսքանից հետո ղեկավարի։
Հակոբյանը վստահ է, որ դարավոր Հայաստանում դավաճաններին պատժել այդպես էլ չեն սովորել։