ԵՐԵՎԱՆ, 24 նոյեմբերի – Sputnik. Չի կարելի հերքել ռուսական մշակույթի ահռելի ազդեցությունը ժամանակակից աշխարհի վրա։ Նման կարծիք հայտնեց ՀՀ վարչապետ Նիկոլ Փաշինյանն այսօր՝ պատասխանելով Բելգիայում բնակվող մեր հայրենակիցներից մեկի հարցին, որը վերաբերում էր ռուսաց լեզվի և մշակույթի ազդեցությանը մեր երկրում։
«Կարելի է ամենատարբեր քաղաքական վերաբերմունք ունենալ ՌԴ-ի նկատմամբ, բայց որևէ կերպ հնարավոր չեմ համարում հերքելը ռուսական մշակույթի ահռելի, հսկայական դերն ընդհանրապես ժամանակակից աշխարհի և քաղաքակրթության վրա»,- նշեց Փաշինյանը։
Ըստ վարչապետի՝ իհարկե, կարելի է սեփական կարծիքն ունենալ և կասկածի տակ դնել ամեն ինչ։ Բայց նաև լեգիտիմ չէ կասկածի տակ դնել, օրինակ, Տոլստոյի, Չայկովսկու, Շոստակովիչի, մշակույթի, քաղաքականության, գիտության ոլորտներում տասնյակ, հարյուրավոր անունների ունեցած մեծ դերը։
Փաշինյանը հիշեցրեց իր ավելի վաղ արած հայտարարության մասին. նա Հայաստանում այլ պաշտոնական լեզու հայերենից բացի չի պատկերացնում։
Բայց նաև կոչ է անում բոլոր դպրոցականներին, երիտասարդներին հնարավորինս շատ օտար լեզուներ սովորել, այդ թվում՝ ռուսերեն։ Ժամանակակից աշխարհում դա շատ կարևոր է ինչպես անհատի, այնպես էլ պետության մրցունակության բարձրացման առումով։ Սա հատկապես կարևոր է Հայաստանի և Ռուսաստանի խորը տնտեսական, մշակութային և քաղաքական կապերի պայմաններում։
Ինչ վերաբերում է Ռուսաստանից ժամանած ռելոկանտներին, ապա, ինչպես նշեց Փաշինյանը, Հայաստանում շատ ուրախ են նրանց ներկայությամբ։
«Այստեղ եկած մարդիկ բլոգեր են անում և կիսվում Հայաստանի մասին իրենց տպավորություններով։ Ես նայեցի մի քանի նման նյութեր: Եվ ես համապատասխան հանձնարարություն եմ տվել «Հանրային կապերի և տեղեկատվության կենտրոն» ՊՈԱԿ-ին ուսումնասիրել այդ մարդկանց տպավորությունները»,- ասաց Փաշինյանը։
Վարչապետի խոսքով՝ նույնիսկ հայերն իրենք իրենց այդքան լավ չեն ճանաչում։ Ռելոկանտներն էլ նկատում են այն, ինչը հայերին սովորական ու ծանոթ է թվում։