ԵՐԵՎԱՆ, 23 նոյեմբերի – Sputnik. ՀՀ Արմավիրի մարզում վրաերթ է տեղի ունեցել, տուժածն անչափահաս տղա է։ Տեղեկությունը հայտնում է shamshyan.com-ը։
«Այսօր` ժամը 18:30-ի սահմաններում, Արմավիրի մարզի բնակիչ 27-ամյա Կարեն Ե.-ն իր վարած Mercedes մակնիշի ավտոմեքենայով Արմավիր քաղաքի Երևանյան փողոցում՝ «Մեր տուն» ռեստորանային համալիրի դիմաց, վրաերթի է ենթարկել հետիոտն, Արմավիրի մարզի բնակիչ 11-ամյա Հրաչ Մ.-ին»,–գրում է կայքը:
Վարորդը փախուստի չի դիմել, օգնել է երեխային տեղափոխել «Արմավիր» բժշկական կենտրոն:
Վրաերթի մասին տեղեկությունը ոստիկանության Արմավիրի բաժնից փոխանցել են Արմավիրի մարզային քննչական վարչություն:
Վրաերթի փաստով քննչական վարչությունում նախաձեռնվել է քրեական վարույթ:
Վարորդն անցել է սթափության փորձաքննություն, եղել է սթափ: