ԵՐԵՎԱՆ, 23 նոյեմբերի – Sputnik. Երևանի պետական համալսարանում տեղի ունեցած պայթյունից տուժած և ծանր վիճակում գտնվողներից մեկը մահացել է։ Տեղեկությունը հայտնում է ՀՀ առողջապահության նախարար Անահիտ Ավանեսյանը։
Նա նշել է, որ կառավարության նիստից հետո լրագրողների հետ զրույցում հայտնած տեղեկությունը, թե տուժածների առողջական վիճակը ծանր է, երեկվա տվյալ է։
«Ցավոք, հիվանդներից մեկի վիճակը կտրուկ վատացել է (ինչը նաև այրվածքային հիվանդության առանձնահատկություններից է): Բուժաշխատողների կողմից սիրտ-թոքային վերակենդանացումը եղել է անարդյունավետ, պացիենտի կյանքը փրկել չի հաջողվել»,– գրել է Ավանեսյանը:
Մյուս պացիենտի առողջական վիճակն այս պահին կայուն է, տեղափոխվել է հիվանդասենյակ: Հաշվի առնելով այրվածքների մակերեսը և խորությունը` նա դեռևս պետք է գտնվի բժշկական դինամիկ հսկողության տակ:
Հիշեցնենք` նոյեմբերի 17-ին ԵՊՀ քիմիայի ֆակուլտետի նկուղային հարկում` պոմպակայանի համար նախատեսված սենյակում պայթյուն էր գրանցվել, որից հետո հրդեհ էր բռնկվել։ Պայթյունի հետևանքով 1 մարդ տեղում մահացել էր, 3-ին տեղափոխել էին բուժկենտրոններ։