ԵՐԵՎԱՆ, 22 նոյեմբերի – Sputnik. ՀՀ–ում չեղարկել են անշարժ գույքի պարզեցված գրանցումն առանց նոտարի։ ՀՀ քաղաքացիական օրենսգրքում համապատասխան փոփոխությունների նախագիծը Ազգային ժողովում ընդունվեց երկրորդ ընթերցմամբ և ամբողջությամբ:
ՀՀ արդարադատության նախարարության ներկայացուցիչների փաստարկներով` օրինագիծն առաջարկվել է հարկերից խուսափելու և փողերի լվացման ռիսկը կանխելու նպատակով:
Մինչ օրս Քաղաքացիական օրենսգիրքը թույլ էր տալիս գույքի հետ գործարքները` վաճառք, վարձակալություն և այլն, գրանցել կադաստրի պետական կոմիտեում՝ առանց նոտարի, եթե դրանք կնքվել են պատրաստի նմուշներով։
Այդուհանդերձ, վերջին տարիներին զգալիորեն աճել են գործարքների հետ կապված ռիսկերը։ Մասնավորապես, կտրուկ աճել է անշարժ գույքի նվիրատվության հետ կապված գործարքների թիվը։ 2020 թ. դրանք կնքվել են 12 691, 2021 թ.՝ 17 942, 2022 թ.՝ 23 099։ Այս հանգամանքը ՀՀ արդարադատության նախարարությանը կասկածի տեղիք տվեց, որ դե յուրե նվիրատվությունն իրականում իրենից ներկայացնում է կամ վաճառք` հարկերից խուսափելու փորձ, կամ ապօրինի ձեռք բերած գույքը «լվանալու» փորձ։
Այդ ռիսկերից խուսափելու համար բոլոր գործարքները` առանց բացառության, պետք է ձևակերպվեն նոտարների մոտ։ Նրանք պետք է ՀՀ կենտրոնական բանկ փոխանցեն բոլոր գործարքների մասին տեղեկությունները, որոնք նրանց մոտ կասկածներ կառաջացնեն։