ԵՐԵՎԱՆ, 22 նոյեմբերի – Sputnik. Կաշառք ստանալու և կաշառք տալու կասկածանքով ձերբակալվել է 9 անձ, այդ թվում՝ ՀՀ միասնական սոցիալական ծառայության Արտաշատի տարածքային կենտրոնի պաշտոնատար անձինք։ Տեղեկությունը հայտնում է ՀՀ հակակոռուպցիոն կոմիտեի մամուլի ծառայությունը։
Կոմիտեից հայտնում են, որ ՀՀ աշխատանքի և սոցիալական հարցերի նախարարության միասնական սոցիալական ծառայության Արտաշատի տարածքային կենտրոնի սոցիալական աշխատանքի և զբաղվածության ծրագրերի բաժնի պետ Տ. Կ.–ն և նույն ծառայության նշանակման վարչության բաժիններից մեկի պետ Հ. Ս.–ն ավագ սոցիալական աշխատող Լ. Մ.–ի հետ նախնական համաձայնությամբ բազմաթիվ նպաստառուներից պարբերաբար տարբեր չափերի կաշառք են ստացել:
Մասնավորապես, 2023 թ. հոկտեմբերի 29–ին Արարատի մարզի Մրգանուշ բնակավայրի բնակչի՝ պետական նպաստ ստանալու ժամկետը երկարաձգելու գործընթացն անխոչընդոտ կազմակերպելու համար սոցիալական ծրագրերի բաժնի աշխատակից Լ. Մ.–ն Տ. Կ.–ի հետ և իր մտերիմ Է. Խ.–ի միջնորդությամբ բնակչից կաշառք է ստացել 30.000 դրամ:
Բացի այդ, նույն բնակավայրի մեկ այլ բնակչի օգտին գործողություն կատարելու համար 2023 թ. սեպտեմբերին կաշառք է ստացել 35.000 դրամ:
Պարզվել է նաև, որ Տ. Կ.–ն և Լ. Մ.–ն 2023 թ. հոկտեմբերին և նոյեմբերին Արարատի մարզի ևս երկու նպաստառուից որպես կաշառք ստացել են 50.000 և 35.000 դրամ:
Իսկ 2023 թ. հոկտեմբերի 31–ին Լ. Մ.–ն Արարատի մարզի բնակչին տարիքային աշխատանքային կենսաթոշակ ստացողների ցուցակում ընդգրկելու հարցը կարգավորելու դիմաց նրա ամուսնուց որպես կաշառք պահանջել և ստացել է 300.000 դրամ, որից 200.000 դրամը փոխանցել է բաժնի պետ Հ. Ս.–ին:
Նպաստառուներից կաշառք ստացած Տ. Կ.–ն, Հ. Ս.–ն և Լ.Մ.–ն, վերջիններիս կաշառք տված 5 անձինք և կաշառքի միջնորդություն կատարած Է. Խ.–ն ձերբակալվել են: Նրանց մեղադրանքներ են ներկայացվել կաշառք ստանալու, տալու և կաշառքի միջնորդության համար:
Դատարանի որոշմամբ միասնական սոցիալական ծառայության երկու բաժնի պետերի՝ Տ. Կ.–ի և Հ. Ս.–ի նկատմամբ որպես համակցված խափանման միջոցներ են ընտրվել վարչական հսկողությունն ու պաշտոնավարման կասեցումը, իսկ ավագ սոցիալական աշխատող Լ. Մ.–ի նկատմամբ՝ չբացակայելու արգելքը, պաշտոնավարման կասեցումը և գրավը:
Նախաքննությունը շարունակվում է: