ԵՐԵՎԱՆ, 8 նոյեմբերի – Sputnik. 2064 ՀՀ տնտեսվարող 2023 թ. 9 ամսում փոխել է հարկման համակարգը` դառնալով ավելացված արժեքի հարկ վճարող։ ՀՀ ԱԺ ֆինանսավարկային և բյուջետային հարցերի մշտական հանձնաժողովում այդ մասին տեղեկացրեց ՀՀ պետական եկամուտների կոմիտեի նախագահի տեղակալ Արտյոմ Սմբատյանը։
«Ավելացված արժեքի հարկման, այսինքն` ընդհանուր հարկման համակարգ տեղափոխված 2064 տնտեսվարողից 132–ը իրենց հարկման ռեժիմը փոխել են ՊԵԿ վարչարարության արդյունքում։ Բանն այն է, որ 2023 թ. փետրվարից ՊԵԿ վարչարարության մեջ նոր մեթոդաբանություն ենք սկսել կիրառել. բոլոր այն հարկ վճարողների դեպքում, որոնք մեր դիտարկումներով ռիսկային են ու արել են պարբերական խախտումներ, օրինակ` ՀԴՄ չեն տրամադրել, մեզ համար ակնհայտ է դառնում, որ նրանք քողարկված են հատուկ հարկման համակարգերում, իսկ իրականում պետք է լինեն ընդհանուր հարկման դաշտում»,– ընդգծեց Սմբատյանը։
Ըստ նրա` տվյալ տնտեսվարողների հետ ՊԵԿ–ն անընդհատ իրականացրել է կոշտ վարչարարություն, մինչև որ տնտեսվարողներն ինքնուրույն հասկացել են, որ իրենց հասցեագրված տուգանքներն անխուսափելի են լինելու։