ԵՐԵՎԱՆ, 4 նոյեմբերի – Sputnik. Արմավիրի մարզի Փարաքար-Էջմիածին մայրուղին ընդգրկող ճանապարհահատվածում կայացել է «Հայաստանի Հանրապետության վարչապետի գավաթ» խճուղավազքի սիրողական 3-րդ մրցաշարը, որին հաջորդած պարգևատրման արարողությանը ներկա է եղել ՀՀ վարչապետ Նիկոլ Փաշինյանը: Տեղեկությունը հայտնում է ՀՀ վարչապետի մամուլի ծառայությունը։
Նիկոլ Փաշինյանը «ՀՀ վարչապետի գավաթ» խճուղավազքի սիրողական 3-րդ մրցաշարի պարգևատրման արարողության ժամանակ
Մրցաշարն անցկացվել է 3 տարիքային խմբով, ինչպես նաև առանձին գործող աթլետ մարզիկների խմբով։
Առաջին տարիքային խմբում (2006-2010 թթ. ծնված) դպրոցականները հաղթահարել են 4 կմ վազքատարածությունը. մեկնարկը տրվել է «Զվարթնոց» պատմամշակութային արգելոց-թանգարանի հարակից տարածքից։
Երկրորդ (2005-1983 թթ․ ծնված կանայք և տղամարդիկ) և երրորդ (1982 թ. ծնված և բարձր տարիքի կանայք և տղամարդիկ) տարիքային խմբերի ներկայացուցիչները, ինչպես նաև առանձին գործող աթլետ մարզիկները վազել են 10 կմ՝ Փարաքար–Էջմիածին մայրուղու երկայնքով։
Մրցաշարին 3 տարիքային խմբերում, ինչպես նաև առանձին գործող աթլետների խմբերում 1-ին, 2-րդ և 3-րդ տեղերը գրաված մասնակիցները պարգևատրվել են ԿԳՄՍ նախարարության համապատասխան կարգի հավաստագրերով, գավաթներով, մեդալներով:
Երեք տարիքային խմբերում և առանձին գործող աթլետների խմբերում 1-10-րդ տեղեր գրաված մասնակիցները դրամական մրցանակներ են ստացել՝ 1-ին տեղ՝ 1.000.000 դրամ, 2-րդ տեղ՝ 500.000 դրամ, 3-րդ տեղ՝ 300.000 դրամ, 4-րդ տեղ՝ 100.000 դրամ, 5-10-րդ տեղ՝ 50.000 դրամ:
Մրցանակները հանձնել են վարչապետ Նիկոլ Փաշինյանը, ԿԳՄՍ նախարար Ժաննա Անդրեասյանը, առողջապահության նախարար Անահիտ Ավանեսյանը, ԿԳՄՍ նախարարի տեղակալ Կարեն Գիլոյանը, Արմավիրի մարզպետ Էդվարդ Հովհաննիսյանը, Վաղարշապատ համայնքի ղեկավար Դիանա Գասպարյանը:
«Այս մրցաշարը կազմակերպվել է` ընդգծելու բոլոր իրավիճակներում առաջ ընթանալու, մեր հաստատակամությունը․․․Մենք առաջ կընթանանք քայլելով, երբեմն վազելով, երբեմն շատ դժվար կլինի՝ անհնարինության աստիճան, բայց մենք մեր ընթացքը չենք կասեցնի, որովհետև մեր նպատակն ազատ, ուժեղ, ինքնիշխան, երջանիկ և անվտանգ Հայաստանի Հանրապետությունն է»,-ասել է Փաշինյանը:
Նա ընդգծել է, որ «Վարչապետի գավաթը» շատ կարևոր նախագիծ է իրենց համար, և ամեն ինչ անելու են այն զարգացնելու, ավելի կազմակերպված, ավելի գրավիչ, ավելի մասսայական դարձնելու համար:
Նիկոլ Փաշինյանը «ՀՀ վարչապետի գավաթ» խճուղավազքի սիրողական 3-րդ մրցաշարի պարգևատրման արարողության ժամանակ