ԵՐԵՎԱՆ, 3 նոյեմբերի – Sputnik. «Վերածնվող Հայաստան» կուսակցության անդամ Անժելա Նալբանդյանն այսօր դիմում է գրել` հրաժարվելով պատգամավորական մանդատից։ Այդ մասին նա տեղեկացրել է ֆեյսբուքյան իր էջում։
«Այսօր պաշտոնական դիմում եմ ներկայացրել ՀՀ ԱԺ պատգամավորական մանդատից հրաժարվելու վերաբերյալ: Որոշումս, կարծում եմ, միանգամայն պարզ է ու հասկանալի՝ հաշվի առնելով Ազգային Ժողովից հեռանալու՝ «Վերածնվող Հայաստան» կուսակցության դեռևս նախորդ տարի նոյեմբերին կայացրած և գործող որոշումը»,– նշել է Նալբանդյանն իր գրառման մեջ:
Ավելի վաղ հայտնել էինք, որ 2022 թ. նոյեմբերի 29–ին «Վերածնվող Հայաստան» կուսակցությունը դադարեցրեց իր գործունեությունը ՀՀ Ազգային ժողովում։ Այդ ժամանակ մանդատները վայր դրեցին ՀՀ ԱԺ «Հայաստան» խմբակցության պատգամավոր, կուսակցության անդամ երեք պատգամավոր` Վահե Հակոբյանը, Հռիփսիմե Ստամբուլյանն ու Ելենա Կիրակոսյանը։
Միևնույն ժամանակ, Անժելա Նալբանդյանը նշել է, որ «Վերածնվող Հայաստան» կուսակցությունը շարունակում է իր գործունեությունը ընդդիմադիր դաշտում` կուսակցության հռչակած արժեքների ու քաղաքականության շրջանակում:
Հիշեցնենք, որ 2021 թ. հունիսի 20-ին «Վերածնվող Հայաստան» կուսակցության ներկայացուցիչները ԱԺ պատգամավոր են ընտրվել «Հայաստան» կուսակցությունների դաշինքի համապետական ընտրական ցուցակով: