ԵՐԵՎԱՆ, 3 նոյեմբերի – Sputnik. Պատժամիջոցները և Ռուսաստանի հետ տնտեսական կապերի խզումն արդեն մոտ 1,5 տրիլիոն դոլար են արժեցել Եվրամիությանը, փոխադարձ առևտրի ծավալը նույնպես ձգտում է զրոյի: Եվրասիական տնտեսական համաժողովի շրջանակում լրագրողների հետ զրույցում այս մասին ասել է ՌԴ փոխարտգործնախարար Ալեքսանդր Գրուշկոն:
Նրա խոսքով՝ 2013 թվականին ՌԴ-ի հետ ԵՄ առևտրի ծավալը կազմել է 417 միլիարդ դոլար, պատժամիջոցների բացակայության դեպքում այս տարի կարող էր կազմել 700 միլիարդ դոլար, սակայն 2022 թվականին կազմել է 200 միլիարդ դոլար, 2023 թվականի առաջին կիսամյակում՝ 47 միլիարդ դոլար, իսկ տարեվերջին կլինի 100 միլիարդ դոլարից պակաս: Հաջորդ տարի Գրուշկոն կանխատեսում է 50 միլիարդ շրջանառություն, իսկ հետո այդ թիվը կմոտենա զրոյի։
Գրուշկոն ավելացրել է, որ գերմանական արդյունաբերությունը գազը ԱՄՆ-ի ներքին շուկայի գնից եռակի թանկ է գնում, արդյունաբերությունը հոսում է Հյուսիսային Ամերիկա:
ՌԴ-ում ավելի վաղ բազմիցս ասել էին, որ Արևմուտքը լուրջ սխալ է թույլ տվել՝ հրաժարվելով Ռուսաստանից ածխաջրածիններ գնելուց, և կհայտնվի նոր, ավելի ուժեղ կախվածության մեջ՝ պայմանավորված ավելի բարձր գներով։ Մոսկվայում հայտարարել են, որ նրանք, ովքեր հրաժարվել են դրանից, միևնույնն է, միջնորդների միջոցով ռուսական նավթը և գազը ավելի թանկ են գնում և շարունակելու են գնել։
Ըստ ՌԴ-ի` Արևմուտքի խիզախությունը չի հերիքում, որ ընդունի Մոսկվայի դեմ պատժամիջոցների ձախողումը, թեև արևմտյան երկրներում բազմիցս կարծիքներ են հնչել, որ հակառուսական պատժամիջոցներն անարդյունավետ են։ ՌԴ նախագահ Վլադիմիր Պուտինն ավելի վաղ հայտարարել էր, որ Ռուսաստանին զսպելու և թուլացնելու քաղաքականությունը Արևմուտքի երկարաժամկետ ռազմավարությունն է, իսկ պատժամիջոցները լուրջ հարված են հասցրել ամբողջ համաշխարհային տնտեսությանը: Նրա խոսքով՝ Արևմուտքի հիմնական նպատակը միլիոնավոր մարդկանց կյանքը վատթարացնելն է։