ԵՐԵՎԱՆ, 2 նոյեմբերի – Sputnik. Նոյեմբերի 1–ից ԱԱԾ–ում արդեն իսկ գործում է ՀՀ իշխանությունների նախաձեռնած՝ «Խաղաղության խաչմերուկ» նախագծի համար ստեղծված ստորաբաժանումը։ ՀՀ կառավարության նիստի ժամանակ այդ մասին հայտարարեց ՀՀ վարչապետ Նիկոլ Փաշինյանը։
Ավելի վաղ հայտնել էինք, որ Թբիլիսիի «Մետաքսի ճանապարհ» միջազգային համաժողովի ժամանակ ՀՀ վարչապետ Նիկոլ Փաշինյանը հայտարարել էր ԱԱԾ հատուկ այս ստորաբաժանման մասին։
«Իհարկե, նախկինում այդ ուղղությամբ մենք որոշակի նախապատրաստական աշխատանքներ արել ենք, քանի որ մեր ծրագրերում այդ նախաձեռնությունը կար։ ԱԱԾ համապատասխան ստորաբաժանումն արդեն ձևավորված է ու շոշափելի ձևով կահավորված։ Գործնականում այն երեկվանից արդեն սկսել է իր աշխատանքները»,– տեղեկացրեց նա։
Ըստ վարչապետի` ՀՀ ԱԱԾ կազմում ստեղծված ստորաբաժանման գործառույթը պետք է լինի ՀՀ–ով անցնող տարաշրջանային և միջազգային ճանապարհների, երկաթգծերի, գազամուղների, մալուխների, էլեկտրահաղորդման գծերի, ինչպես նաև այս ենթակառուցվածքներով ապրանքների, բեռների, տրանսպորտային միջոցների և մարդկանց անցման անվտանգությունն ապահովելը։
Հիշեցնենք, որ 2023 թ. հոկտեմբերի 17–ին Եվրոպական խորհրդարանում իր ելույթի ժամանակ ՀՀ վարչապետ Նիկոլ Փաշինյանն հայտարարեց, որ ՀՀ–ն պատրաստ է վերականգնելու Մեղրիի երկաթուղին, որը Հայաստանի հարավով կկապի ոչ միայն ՀՀ–ն և Ադրբեջանը, այլև ՀՀ-ի հարավային շրջանները հյուսիս–արևմտյան շրջանների հետ։ Նրա խոսքով` ՀՀ–ում այս նախագիծն անվանում են «հայկական խաչմերուկ»։