ԵՐԵՎԱՆ, 2 նոյեմբերի – Sputnik. Վերջին երկու ամսվա ընթացքում Հեռուստատեսության և Ռադիոյի հանձնաժողովումը ՀՀ–ում հեռարձակվող ռուսական ալիքների կողմից խախտումների վերաբերյալ երկու տեղեկանք է ուղարկել ԲՏԱ նախարարություն, իսկ մեկ տարվա ընթացքում 3 խախտում է արձանագրել։ Այս մասին ԱԺ–ում 2024 թվականի բյուջեի նախագծի քննարկման ժամանակ ասաց ՀՌՀ նախագահ Տիգրան Հակոբյանը։
Նրա խոսքով` հանձնաժողովը մի բան էլ գերակատարել է օրենսդրությամբ և միջպետական համաձայնագրով իր վրա դրված պարտականությունները, որն է մշտադիտարկել հեռուստաալիքները և խախտումների մասին տեղեկանք ներկայացնել ԲՏԱ նախարարություն։
«Ամիսն առնվազն 5 օր մենք մշտադիտարկում ենք իրականացնում, եթե գտնում ենք, որ այդտեղ կան խախտումներ, ուղարկում ենք տեսանյութերը և վերծանումները։ Այլ գործառույթ մենք չունենք։ Եվ ըստ համաձայնագրի` ՀՀ–ի կողմից ռուսական կողմի հետ բանակցողը ԲՏԱ նախարարությունը և ԱԳՆ–ն են»,–ասաց նա։
ՔՊ–ական պատգամավոր Սիսակ Գաբրիելյանի ճշտող հարցին` միայն վերջի՞ն հայտնի հաղորդումն է դիտարկվել որպես խախտում, թե նախկինում էլի դեպքեր են եղել, Հակոբյանը նշեց, որ խախտումները գրանցվել են անցյալ տարի դեկտեմբերին, այս տարվա սեպտեմբերին և հոկտեմբերի վերջին, երբ որ հայտնի սկանդալային հաղորդումը եղավ։
Նա նշեց, որ թեպետ իր լիազորությունների շրջանակում չէ, սակայն այդ խախտումների հետ կապված երեք անգամ հանդիպել է ՌԴ թվային զարգացման նախարարի հետ, իրեն ներկայացրել է իրավիճակը` փաստաթղթավորված։ Երկու անգամ հանդիպել է «Ռոսկոմնադզոր» դաշնային ծառայության ղեկավարի և տեղակալի հետ, Մոսկվայում հանդիպել է նաև ռուսական պետական հեռուստառադիոընկերության ղեկավարության հետ, ինչպես նաև ՌԴ ժուռնալիստների միության նախագահին և Ռուսաստանում ՀՀ դեսպանին է ներկայացրել իրավիճակը։
«Այսինքն` ինչ կարողանում եմ`անում եմ, բայց վերջանական որոշումները, քաղաքական կոնսուլտացիաները, որոնք պարտադրված են անցկացնել երկու կողմերի միջև, ըստ հայ–ռուսական համաձայնագրի, դա հանձնաժողովի լիազորությունների մեջ չէ»,–հավելեց նա։
Հիշեցնենք` իշխող «Քաղաքացիական պայմանագիր» խմբակցության պատգամավոր Լուսինե Բադալյանը շաբաթներ առաջ հայտարարել էր, որ անհրաժեշտ է անջատել ռուսական հեռուստաալիքները «հակահայկական կոնտենտի» պատճառով, որը վտանգ է ներկայացնում երկրի ազգային անվտանգության համար: Նա նաև նշել էր, որ նման նախաձեռնության քննարկումն անցկացվում է արդեն տևական ժամանակ և քննարկման կդրվի Ազգային ժողովում:
ՌԴ Դաշնային խորհրդի միջազգային հարցերով կոմիտեի ղեկավար Գրիգորի Կարասինն անդրադարձել էր ՔՊ–ական պատգամավորի հայտարարություններին և ասել, որ համոզված է` ՀՀ–ում նման առաջարկներն աջակցություն չեն գտնի և չեն խաթարի երկու ժողովուրդների դարավոր բարեկամության հիմքերը՝ ի շահ ինչ-որ քաղաքական կոնյունկտուրայի։
Այնուհետև հոկտեմբերի 23–ին ռուսական «Առաջին ալիքով» հեռարձակված հաղորդման ընթացքում կոպիտ արտահայտություններ էին հնչել ՀՀ վարչապետ Նիկոլ Փաշինյանի հասցեին: Ծրագրին մասնակցել էր նաև «Մայր Հայաստան» ընդդիմադիր դաշինքի ղեկավար Անդրանիկ Թևանյանը: Հաղորդման համար ՌԴ դեսպան Սերգեյ Կոպիրկինը կանչվել էր ՀՀ արտաքին գործերի նախարարություն։