ԵՐԵՎԱՆ, 2 նոյեմբերի – Sputnik. Լեռնային Ղարաբաղից տեղահանված 1300 ընտանիքի հատկացվել է միանվագ ֆինանսական աջակցություն։ Տեղեկությունը հայտնում է «Գազպրոմ Արմենիա» ՓԲԸ-ի մամուլի ծառայությունը։ Աջակցության ծրագիրն իրականացվել է երկու փուլով։
Յուրաքանչյուր ընտանիքի տրամադրվել է 100 հազար դրամի չափով ֆինանսական աջակցություն։ Ֆոնդը ձևավորվել էր աշխատողների հանգանակություններից, ինչպես նաև ընկերության աշխատողների արհեստակցական կազմակերպության կողմից հատկացված միջոցներից։
«Ծրագրի առաջին փուլով՝ տեղահանված հայրենակիցներին օժանդակելու նպատակով, կեցավայրի վարձակալության և կոմունալ ծախսերի փոխհատուցում էր տրամադրվել 600 ընտանիքի»,– տեղեկացնում են ընկերությունից։
Փոխհատուցումը նախատեսված է վեց ամիս ժամկետով։ Առաջնահերթությունը տրվել է բազմանդամ և բազմազավակ ընտանիքներին։
Նաև հրատապ կերպով վերականգնվել են ընկերության հաշվեկշռում գտնվող «Կարին» հանգստյան տան ենթակառուցվածքները` 45 տեղահանված ընտանիքների կացարաններով և կենցաղային անհրաժեշտ պայմաններով ապահովելու համար:
Հիշեցնենք` Ադրբեջանը սեպտեմբերի 19–ին լայնամասշտաբ հարձակում սկսեց Արցախի դեմ։ Ըստ տեղեկությունների` ադրբեջանական ագրեսիայի զոհերի թիվը գերազանցում է 220-ը։
Սեպտեմբերի 20–ին Արցախի իշխանությունն ընդունեց կրակի դադարեցման վերաբերյալ առաջարկությունը: Սեպտեմբերի 21–ին Ստեփանակերտի ու Բաքվի ներկայացուցիչները հանդիպեցին Եվլախում, սեպտեմբերի 25–ին` Իվանյանում, սեպտեմբերի 29-ին` կրկին Եվլախում։ Սեպտեմբերի 24-ին սկսվեց արցախցիների բռնի տեղահանումը։
Սեպտեմբերի 28–ին Արցախի նախագահ Սամվել Շահրամանյանը հրամանագիր ստորագրեց, ըստ որի` Արցախի Հանրապետությունը 2024 թվականի հունվարի 1-ից կդադարի գոյություն ունենալ։
Վերջին տվյալներով` ՀՀ–ում Արցախից բռնի տեղահանված 101 848 անձ է հաշվառվել և նույնականացվել։