Գազայի հատվածում խմելու ջրի բացակայությունը ամենասուր խնդիրներից է տարածաշրջանում հակամարտության սրումից և Իսրայելի կողմից անկլավը շրջափակելուց հետո։
Իսրայելի ռմբակոծությունների արդյունքում Գազայի հատվածում բազմաթիվ աղազերծման կայաններ շարքից դուրս են եկել։ Պետք է ժամերով հերթ կանգնել։
«Մարդիկ հավաքվում են, կռվում, մեռնում են ջրի համար։ Սա ուղղակի աղետ է։ Մեզ համար շատ դժվար է, մեր երեխաները լացում են, ջուր են ուզում։ Որտեղի՞ց ճարենք»։ - ասում է տեղի բնակիչներից մեկը։
Իսրայելը, որը հոկտեմբերի սկզբից դադարեցրել էր էլեկտրաէներգիայի և վառելիքի մատակարարումները Գազայի հատված, թույլատրում է միայն սահմանափակ քանակությամբ մարդասիրական օգնություն:
«Խղճացեք մեզ, ժողովուրդ, դուք պետք է մեզ օգնեք, լույս ու ջուր տվեք, ուտելիք չկա, ջուր չկա, օգնեք մեզ, թող ամբողջ աշխարհը մեզ օգնի»,- ասում է մեկ այլ կին։
Հիշեցնենք` հոկտեմբերի 7-ի առավոտյան Իսրայելը Գազայի հատվածից աննախադեպ հրթիռային հարձակման ենթարկվեց։ Իսրայելի բանակի մամուլի ծառայությունից հայտնեցին, որ ծայրահեղականներն ավելի քան 3 հազար հրթիռ են արձակել: Բացի այդ, տասնյակ ահաբեկիչներ ներխուժել են Իսրայելի հարավում գտնվող սահմանամերձ շրջաններ։ Պաղեստինյան ՀԱՄԱՍ շարժման ռազմական թևը հայտարարեց, որ Իսրայելի դեմ «Ալ Աքսայի ջրհեղեղ» գործողություն է անցկացնում: Իսրայելի պաշտպանության բանակն էլ (ՑԱԽԱԼ) հայտնեց Գազայի հատվածում ՀԱՄԱՍ-ի դեմ «Երկաթե թրեր» գործողության մեկնարկի մասին։
Հոկտեմբերի 27–ի երեկոյան իսրայելական ուժերը մտել են Գազայի հատված։ Իսրայելն ավիահարվածներ է հասցնում օդից, ծովից և ցամաքից։