ԵՐԵՎԱՆ, 1 նոյեմբերի – Sputnik. Հայաստանի արդարադատության նախարար Գրիգոր Մինասյանը Հանրապետական կուսակցության փոխնախագահ Արմեն Աշոտյանի դեմ հարուցված քրեական գործում քաղաքական դրդապատճառ չի տեսնում։ Նա այդ մասին ասաց լրագրողների հետ ճեպազրույցում։
Մինասյանի խոսքով՝ բազմաթիվ կոռուպցիոն գործերով մեղադրվող անձինք կարող են պաշտպանության համար օգտագործել տարբեր գործիքներ, որոնց թվում է քրեական գործին քաղաքական դրդապատճառ, ենթատեքստ տալու փորձը։
«Ես համաձայն չեմ այդ գնահատականին, քանի որ տեսնում է օբյեկտիվ վարույթներ։ Քրեական վարույթ իրականացնող մեր գործընկերների համար բացարձակ կապ չունի, թե այդ մարդը քաղաքական որ բլոկից է։ Հանցագործություն կատարած անձը պետք է պատժվի` անկախ նրանից, թե ով ինչ քաղաքական փաթեթավորում է դրան տալիս»,-ասաց նախարարը։
Հիշեցնենք` Արմեն Աշոտյանը երկու ամսով կալանավորվեց հունիսի 16–ին։ Սեպտեմբերի 28–ին Վերաքննիչ հակակոռուպցիոն դատարանի դատավոր Սերգեյ Մարաբյանը մերժեց վերաքննիչ բողոքները և նրան թողեց կալանքի տակ։
Աշոտյանը և Երևանի Հերացու անվան բժշկական համալսարանի նախկին ռեկտոր Միքայել Նարիմանյանը մեղադրվում են բուհին պատկանող մոտ 100 հազար դոլարի գույք հափշտակելու մեջ: Նրանց մեղադրում են «Ծովասար» հյուրանոցային համալիրի քոթեջները ուռճացված գներով (հաջորդած «ատկատներով») ձեռք բերելու համար այն ժամանակահատվածում, երբ ՀՀԿ փոխնախագահը գլխավորել է բուհի հոգաբարձուների խորհուրդը: