ԵՐԵՎԱՆ, 1 նոյեմբերի – Sputnik. Շիրակի մարզի Ախուրյան համայնքում տիրի հրացանի (օդամղիչ հրացան) կրակոցից վիրավորում ստացած 11-ամյա աղջկա վիճակը կայուն ծանր է։ Տեղեկությունը հայտնում է «Սուրբ Աստվածամայր» բժշկական կենտրոնի մամուլի ծառայությունը։
Ավելի վաղ տեղեկացրել էինք, որ հոկտեմբերի 31-ին Ախուրյանում 13-ամյա անչափահաս տղան կրակել է Տիրի հրացանով, ինչի հետևանքով մետաղյա փամփուշտը դիպել է համագյուղացի 11-ամյա աղջկան: Երեխան տեղափոխվել է Ավստրիական մանկական հիվանդանոց, այնտեղից սանավիացիայով` Երևանի «Սուրբ Աստվածամայր» ԲԿ։
Բուժկենտրոնում արված համակարգչային շերտագրության արդյունքում պարզվել է, որ երեխան ունի աջ թոքի սալջարդ, աջից երրորդ կողի կոտրվածքի ողի տարածությունում օտար մարմին՝ փամփուշտ, ինչպես նաև՝ կրծքավանդակի փափուկ հյուսվածքների սալջարդ:
«Աջ պլևրալ խոռոչի դրենավորումից հետո խորհուրդ է տրվել մնալ հսկողության տակ»,– տեղեկացնում են ԲԿ–ից։
Նշվում է, որ այս պահին վիրահատական միջամտության կարիք չկա։
Հիշեցնենք, որ Sputnik Արմենիայի հետ զրույցում Ախուրյան համայնքի ղեկավար Զավեն Մանուկյանը որոշ մանրամասներ էր հայտնել։ Նրա խոսքով՝ դեպքը տեղի է ունեցել խաղահրապարակում:
«Տղա երեխան ծնողներից թաքուն ՏԻՐ–ի հրացանը վերցրել, տանից դուրս է եկել: Խաղահրապարակում ուզել է կրակել ու կպել է խաղընկերուհուն: Երեխաները մշտապես այդ խաղահրապարակում են խաղում, նաև նույն դպրոցում են սովորում»,-նշել էր նա։
Մանուկյանը վստահեցրել էր, որ դեպքի պատճառով համայնքում երկու ընտանիքների միջև վիճաբանություն չի առաջացել։