ԵՐԵՎԱՆ, 31 հոկտեմբերի – Sputnik. Միկրոձեռնարկատիրության սուբյեկտների նկատմամբ կանոնների փոփոխությունից հետո 2023-ի օգոստոսին միկրոձեռնարկատիրության դաշտում գործող բիզնեսներում շուրջ 2000 աշխատատեղ «կորել է»: Այս մասին հայտարարեց ՊԵԿ նախագահ Ռուստամ Բադասյանը ՀՀ Ազգային ժողովում 2024 թ. պետական բյուջեի նախագծի քննարկման ժամանակ` պատասխանելով ՔՊ խմբակցության պատգամավոր Հովիկ Աղազարյանի հարցին։
Պատգամավորը հետաքրքրվում էր միկրոբիզնեսի դաշտում նկատվող բացասական երևույթներից՝ նշելով, որ խոշոր ընկերությունները հաճախ փոքր բիզնես են բացում, այնտեղից ապրանք գնում ու այդպիսով նվազեցնում հարկման բազան:
Ռուստամ Բադասյանը նշեց` քանի դեռ միկրոհամակարգը կա, այդտեղ չարաշահումներ լինելու են։
«Օգոստոսին նկատեցինք, որ միկրոյում շուրջ 2000 աշխատատեղ «կորել է»: Այսինքն՝ ոչ թե 2000 աշխատող սկսել են ընդհանուր դրույքաչափով գործել և հարկերը վճարել, այլ ուղղակի կա՛մ աշխատանքից ազատել են, կա՛մ ցույց են տալիս, որ ազատել են»,-ասաց Բադասյանը:
ՊԵԿ նախագահը տեղեկացրեց, որ վարչարարություն է սկսվել այդ 2000 աշխատատեղը հայտնաբերելու համար: