ԵՐԵՎԱՆ, 31 հոկտեմբերի – Sputnik. Հայաստանի հանրակրթական դպրոցներում այս պահի դրությամբ սովորում է Լեռնային Ղարաբաղից բռնի տեղահանված 16 371 աշակերտ։ Այսօր հրավիրված ճեպազրույցում տեղեկությունը հայտնեց ՀՀ կրթության, գիտության, մշակույթի և սպորտի փոխնախարար Արաքսյա Սվաջյանը:
Նա նշեց՝ 5185 աշակերտ սովորում է Երևանի դպրոցներում, մնացածը՝ մարզային։
Փոխնախարարը հիշեցրեց, որ աշնանային արձակուրդներն ավարտվել են, և կոչ արեց այն բոլոր ծնողներին, որոնց երեխաները դեռ չեն վերսկսել դասերը, շտապել գրանցման հարցում:
Սվաջյանը հիշեցրեց նաև, որ տեղահանվածներին հասանելի է ոչ միայն դպրոցներում, այլև քոլեջներում և բուհերում ուսուցումը: Նրա խոսքով` այս պահին նախնական և միջին մասնագիտական ուսումնարաններում ուսումը շարունակում է Լեռնային Ղարաբաղից տեղահանված 991 անձ, իսկ բարձրագույն ուսումնական հաստատություններում՝ 1645 ուսանող:
«Աշխատանքի զարգացման ծրագրում ընդգրկվելու համար դիմել է Լեռնային Ղարաբաղից բռնի տեղահանված 126 ուսուցիչ, որոնցից 52-ն արդեն գործուղվել են»,- տեղեկացրեց նա:
Արցախից եկած և մարզային դպրոցներում աշխատանքի տեղավորվող ուսուցիչները կստանան աշխատավարձի 30 տոկոս հավելավճար, իսկ Տավուշի և Գեղարքունիքի որոշ դպրոցներում՝ ամսական լրացուցիչ 50 հազար դրամ (ավելի քան 100 դոլար):
Հիշեցնենք` Ադրբեջանը սեպտեմբերի 19–ին լայնամասշտաբ հարձակում սկսեց Արցախի դեմ։ Ըստ տեղեկությունների` ադրբեջանական ագրեսիայի զոհերի թիվը գերազանցում է 220-ը։
Սեպտեմբերի 20–ին Արցախի իշխանությունն ընդունեց կրակի դադարեցման վերաբերյալ առաջարկությունը: Սեպտեմբերի 21–ին Ստեփանակերտի ու Բաքվի ներկայացուցիչները հանդիպեցինԵվլախում, սեպտեմբերի 25–ին` Իվանյանում, սեպտեմբերի 29-ին` կրկինԵվլախում։ Սեպտեմբերի 24-ին սկսվեց արցախցիների բռնի տեղահանումը։
Սեպտեմբերի 28–ին Արցախի նախագահ Սամվել Շահրամանյանը հրամանագիր ստորագրեց, ըստ որի` Արցախի Հանրապետությունը 2024 թվականի հունվարի 1-ից կդադարի գոյություն ունենալ։
Վերջին տվյալներով` ՀՀ–ում Արցախից բռնի տեղահանված 101 848 անձ է հաշվառվել և նույնականացվել։