ԵՐԵՎԱՆ, 27 հոկտեմբերի – Sputnik. Վրաստանից Հայաստան փորձել են առանց հայտարարագրման 150 հատ iPhone տեղափոխել։ Տեղեկությունը հայտնում է ՀՀ պետական եկամուտների կոմիտեի մամուլի ծառայությունը։ Նշվում է, որ թանկարժեք բջջային հեռախոսների ապօրինի տեղափոխման դեպքի բացահայտումն արվել է ՊԵԿ Հյուսիսային մաքսատուն-վարչության Բավրայի մաքսային կետ-բաժնի աշխատակիցների կողմից։
«Վրաստանից Հայաստանի Հանրապետություն ժամանած տրանսպորտային միջոցի զննությունից պարզ է դարձել, որ բեռնախցիկում առկա է «Apple» ապրանքանիշին պատկանող «iPhone» տեսակի 150 բջջային հեռախոս»,– նշված է հաղորդագրության մեջ:
Հեռախոսների ընդհանուր գումարը կազմել է մոտ 178 հազար ԱՄՆ դոլար:
Հարուցվել է վարչական վարույթ «Մաքսային կարգավորման մասին» ՀՀ օրենքի 316-րդ հոդվածի (Ապրանքները և տրանսպորտային միջոցները չհայտարարագրելը կամ դրանց հայտարարագրելը ոչ իրենց անվանմամբ կամ հայտարարագրման ժամանակ ոչ ճշգրիտ տեղեկություններ նշելը) հատկանիշներով։