ԵՐԵՎԱՆ, 27 հոկտեմբերի – Sputnik. Վաշինգտոնը կշարունակի աջակցել Հայաստանին և Ադրբեջանին խաղաղության համաձայնագրի կնքման հարցում։ Լրագրողների հետ ճեպազրույցի ժամանակ այս մասին հայտարարել է ԱՄՆ Պետդեպարտամենտի պաշտոնական ներկայացուցիչ Մեթյու Միլլերը։
«Մենք շարունակում ենք հավատալ, որ դա բխում է երկու կողմերի, տարածաշրջանի և նաև ամբողջ աշխարհի շահերից, որպեսզի կողմերը հասնեն խաղաղության հարցում համաձայնության։ Մենք կշարունակենք պնդել սա»,- ասել է Միլլերը՝ մեկնաբանելով Բրյուսելում նախատեսված` Հայաստանի վարչապետ Նիկոլ Փաշինյանի և Ադրբեջանի նախագահ Իլհամ Ալիևի հանդիպման չեղարկումը։
Հիշեցնենք` ավելի վաղ հաղորդվել էր, որ Եվրոպական խորհրդի նախագահ Շառլ Միշելի, ՀՀ վարչապետ Նիկոլ Փաշինյանի և Ադրբեջանի նախագահ Իլհամ Ալիևի մասնակցությամբ եռակողմ հանդիպում է նախատեսվում հոկտեմբերի վերջին Բրյուսելում։
Հոկտեմբերի 25-ին Հարավային Կովկասի և Վրաստանում ճգնաժամի հարցերով ԵՄ հատուկ ներկայացուցիչ Տոյվո Կլաարն APRI Armenia վերլուծական կենտրոնի` «Առաջընթաց անորոշության պայմաններում» խորագրով համաժողովի ժամանակ հայտարարել է, որ Բրյուսելում նախատեսված հանդիպումը տեղի չի ունենա։
ՀՀ ԱԳ նախարար Արարատ Միրզոյանը, մեկնաբանելով հանդիպման չեղարկումը, ասել է, թե ակնհայտ է, որ Բրյուսելում նախատեսված հանդիպումը չի կայացել, որովհետև Ադրբեջանի նախագահ Իլհամ Ալիևը ժամանակ չի ունեցել։