ԵՐԵՎԱՆ, 25 հոկտեմբերի – Sputnik. Սմբատ Հովհաննիսյանի հեղինակած 7–րդ դասարանի պատմության դասագրքում խեղաթյուրվել են պատմական իրողություններ, և հեղինակը հաճախ իր դիտարկումները ներկայացնում է որպես պատմական իրողություններ։ Ազգային ժողովում ՀՀ կառավարության հետ հարցուպատասխանի ժամանակ հայտարարեց ՀՀ ԱԺ «Հայաստան» խմբակցության պատգամավոր Լիլիթ Գալստյանը։
«Հանրակրթական նոր չափորոշիչով ստեղծված այդ դասագրքից ծնողների, մանկավարժական և մասնագիտական շրջանակների բողոքները շատ են։ Դասագրքում քիչ չեն նաև քերականական սխալները»,– ընդգծեց պատգամավորը։
ՀՀ կրթության, գիտության, մշակույթի և սպորտի նախարար Ժաննա Անդրեասյանն ի պատասխան բավականին կոշտ արձագանքեց` նշելով, որ կրթական բարեփոխումների հենց սկզբից չի դադարում աղմուկը, ու այն ավելի շատ թիրախավորված ու նպատակաուղղված արշավ է։
«Այո, դասագրքում կան արժեբանական փոփոխություններ։ Մենք բազմիցս հայտարարել ենք, որ մեր դպրոցում ամենամեծ արժեքը և առանցքը, որի շուրջ պետք է կառուցվի կրթությունը դա պետությունն է։ Պատմություն առարկայի դասավանդման հիմնական նպատակը պատմական մտածողության ձևավորվումն է։ Պատմությունը բազմաշերտ երևույթ է` ամենատարբեր աղբյուրներ համադրելու, վերլուծելու համար, ինքնուրույն դատողություններ ու վերլուծություններ անելու համար, որոնք այնքան բացակայում են մեր` «հուռա հայրենասիրություն» պաթոսի մեջ, որի մեջ տարիներ շարունակ ողողված է եղել մեր դպրոցը, որից շատ դժվար է լինելու նաև ազատելու մեր դպրոցը»,– հայտարարեց նախարարը։
Անդրեասյանը կոչ արեց բոլորին` համակերպվելու այդ աղմուկի հետ և ևս մեկ անգամ ընդգծեց, որ պատմության դասագրքում ներառված ընդհանուր մոտեցումները չեն սրբագրվելու, քանի որ դրանք են կրթական բարեփոխումների առանցքը։
Միաժամանակ նա նշեց, որ տեխնիկական վրիպակներն ու փաստական անճշտությունները կճշտվեն ու կուղղվեն արդեն հանրակրթական դպրոցների 2–րդ կիսամյակում։
Հավելենք, որ Սմբատ Հովհաննիսյանի հեղինակած 7–րդ դասարանի պատմության դասագրքում տեղ գտած շատ դրույթներ վրդովմունք են առաջացրել հայ հասարակության և մասնագետների մոտ։ Սոցիալական ցանցերում մարդիկ իրենց բողոքն են արտահայտել փաստերի խեղաթյուրման վերաբերյալ և ստորագրահավաք սկսել` պահանջելով շրջանառությունից հանել գիրքը։