ԵՐԵՎԱՆ, 24 հոկտեմբերի – Sputnik. Հայաստանի ու Ադրբեջանի արտաքին գործերի նախարարները Թեհրանում «3+3» ձևաչափով հանդիպման շրջանակում զրույց են ունեցել։ Այս մասին, ըստ ադրբեջանական լրատվամիջոցների, հայտնել է Իրանի արտաքին գործերի նախարար Հոսեյն Ամիր Աբդոլլահիանը։
«Արարատ Միրզոյանի և Ջեյհուն Բայրամովի հանդիպումը քայլերից մեկն է Ադրբեջանի և Հայաստանի միջև խաղաղությանն ու բարեկամությանը տանող ճանապարհին։ «3+3» հանդիպման շրջանակում Ադրբեջանի և Հայաստանի արտաքին գործերի նախարարները խոսելու հնարավորություն են ունեցել։ Այս հանդիպումը կնպաստի կայունության և անվտանգության հաստատմանը Հարավային Կովկասում»,- ասել է Աբդոլահիանը։
Հիշեցնենք` հոկտեմբերի 23–ին Թեհրանում «3+3» ձևաչափով (առանց Վրաստանի) հանդիպում է կայացել արգործնախարարների մակարդակով։ Ձևաչափը նախատեսում էր Ռուսաստանի, Իրանի, Հայաստանի, Ադրբեջանի, Թուրքիայի և Վրաստանի մասնակցությունը, սակայն Թբիլիսին հայտարարեց, որ չի մասնակցի նախաձեռնությանը։
Առաջին հանդիպումը (կրկին առանց Վրաստանի) կայացել էր 2021 թվականի դեկտեմբերին Մոսկվայում, բայց ոչ թե նախարարների, այլ փոխարտգործնախարարների մակարդակով։
Թեհրանի հանդիպումը Ռուսաստանի, Հայաստանի և Ադրբեջանի արտգործնախարարների համար առաջին հնարավորությունն էր՝ քննարկելու վերջին զարգացումները։