ԵՐԵՎԱՆ, 23 հոկտեմբերի – Sputnik. Պակիստանի ընդդիմադիր «Թեհրիք ի Ինսաֆ» կուսակցության առաջնորդ, Պակիստանի նախկին վարչապետ Իմրան խանին և կուսակցության փոխնախագահ Շահ Մահմուդ Քուրեշիին պետական գաղտնիքի հրապարակման գործով պաշտոնական մեղադրանքներ են առաջադրվել, հաղորդում է Geo հեռուստաալիքը:
Սա նշանակում է, որ դատաքննություն է սկսվում, որի շրջանակներում մեղադրող կողմի և մեղադրյալի ապացույցները գրառվում են, իսկ հետագայում արձանագրվում են դատարանի կողմից:
«Թեհրիկ-ի-Ինսաֆ»-ի երկու ղեկավարներին էլ պաշտոնական մեղադրանքներ են առաջադրել այն բանից հետո, երբ նրանք միջնորդություն էին ներկայացրել մեղադրանքը դադարեցնելու մասին: Դատավորը, մերժելով միջնորդությունները, հայտարարեց, որ դատական նիստը նշանակվել է մեղադրական եզրակացություն կայացնելու համար, և այն կայացել է: Ըստ ընթացակարգի` դատարանը վկաներից պահանջել է ներկայանալ հոկտեմբերի 27-ին»,-ասված է հաղորդագրության մեջ:
Աղբյուրի տվյալներով` Քուրեշին և Խանը առաջադրված մեղադրանքներով իրենց մեղավոր չեն ճանաչել։
Պետական գաղտնիքի հրապարակման գործը վերաբերում է գաղտնի հեռագրին, որը տեղեկություններ է պարունակում այն մասին, որ ամերիկյան իշխանությունները, դժգոհ լինելով Ուկրաինայում ՌԴ հատուկ գործողության նկատմամբ Պակիստանի վարչապետի չեզոք դիրքորոշումից, ցանկանում էին, որ Պակիստանի կառավարությունը հեռացնի Խանին պաշտոնից, իսկ փոխարենը խոստացել են «ավելի ջերմ հարաբերություններ» հաստատել երկրի հետ` սպառնալով մեկուսացմամբ: Հեռագիրն Իսլամաբադ էր ուղարկվել Վաշինգտոնում Պակիստանի դեսպանի կողմից անցյալ տարեսկզբին:
Մեղադրող կողմը պնդում է, որ Խանն ու նրա օգնականներն այդ հեռագրի բովանդակությունը բացահայտել են չարտոնված անձանց և «խեղաթյուրել են փաստերն իրենց հետին դրդապատճառներին և անձնական շահին հասնելու համար»: Նշվում էր նաև, որ նախկին վարչապետն ապօրինի կերպով պահել է փաստաթղթի պատճենը։ Փաստաբանների խոսքով` Պակիստանի պետական գաղտնիքի մասին օրենքի համաձայն` մեղավորը կարող է դատապարտվել 2-14 տարվա ազատազրկման կամ նույնիսկ մահապատժի: